naya janm

udāsī ke āñgan meñ

mahrūmiyoñ ke gulāboñ kī ḳhushbū

mirī saañs ke rāstoñ se guzar kar

garm laave kī sūrat ragoñ meñ bahī jā rahī hai

mujhe ghar kī dīvār-o-dar meñ

ummīdoñ kī parchhā.iyoñ kā vo nauha

nazar aa rahā hai

jo saut-o-sadā kī muqayyad fazā se nikal kar

mujassam huā jā rahā hai

raat kī sab siyāhī mirī aañkh se

mire jism-o-jāñ meñ utartī chalī jā rahī hai

ik ḳhalā mere andar huvaidā huā hai

maiñ is kaifiyat kā maza le rahā huuñ

jise kā.enāt āfrīnash ke lamhoñ meñ mahsūs kartī rahī hai

harf saut-o-sadā

lafz ma.anī kī gahrā.iyoñ se muzayyan nahīñ haiñ

abhī naam se kaam se aur anjām se

mujh meñ taḳhlīq hotī huī koī shai se

mere andar kā aadam shanāsā nahīñ hai magar

kyā ye kam hai mujhe āgahī ne

nayā ik janam de diyā hai

udasi ke aangan mein

mahrumiyon ke gulabon ki KHushbu

meri sans ke raston se guzar kar

garm lawe ki surat ragon mein bahi ja rahi hai

mujhe ghar ki diwar-o-dar mein

ummidon ki parchhaiyon ka wo nauha

nazar aa raha hai

jo saut-o-sada ki muqayyad faza se nikal kar

mujassam hua ja raha hai

raat ki sab siyahi meri aankh se

mere jism-o-jaan mein utarti chali ja rahi hai

ek KHala mere andar huwaida hua hai

main is kaifiyat ka maza le raha hun

jise kaenat aafrinash ke lamhon mein mahsus karti rahi hai

harf saut-o-sada

lafz mani ki gahraiyon se muzayyan nahin hain

abhi nam se kaam se aur anjam se

mujh mein taKHliq hoti hui koi shai se

mere andar ka aadam shanasa nahin hai magar

kya ye kam hai mujhe aagahi ne

naya ek janam de diya hai