naya prometheus

maiñ ḳhushbū jism samundar āñkhoñ kā

ik ḳhvāb churā kar laayā thā

maiñ aag churā kar laayā thā

sahrā-e-vajūd kī tanhā.ī us ḳhvāb se kitnī shādāñ thī

us ātish-e-larzāñ kī tābish taḳhlīq kī zau meñ numāyāñ thī

mirā ḳhvāb vo merā phuul badan

marī aag mire fardā kā chaman

maiñ ḳhvāboñ se masrūr rahā

maiñ ātish par maġhrūr rahā

phir lahr uThī phir qahr huā mirā ḳhvāb hī mujh ko zahr huā

patthar kī chaTTānoñ par mujh ko

zanjīroñ se vābasta kiyā

ḳhud aag bhī ik zanjīr banī

zanjīr banī shamshīr banī

har qais ne mujh ko ye paiġhām diyā

ye haal hamesha qaa.em hai is haal kā istiqbāl nahīñ

is haal kī chakkī meñ tum ko har lamhe piste rahnā hai

tum kaise rihā.ī pāoge

aisā to koī paidā na huā jo tum ko rihā.ī de aa kar

tum ḳhvāboñ se masrūr hue jo boyā thā vo kāTo.ge

sab apne kiye kī ḳhūbī hai a.amāl ko apne bhugtoge

koī niiñd nahīñ koī ḳhvāb nahīñ koī nuur nahīñ koī naar nahīñ

fariyād tumhārī bolī hai alfāz tumhāre aaheñ haiñ

ik qahr-e-ġhazab kargas ke liye

hai jism tumhārā dastarḳhavāñ

vo dastarḳhavāñ pe bikhrī ne.amat se

maflūj-o-siyāh jigar kī lazzat se

har lamhe lutf uThā.egā

har lamhe shor machā.egā

maiñ ḳhushbū jism samundar āñkhoñ kā

ik ḳhvāb churā kar laayā thā

maiñ aag churā kar laayā thā

patthar kī chaTānoñ ne mujh ko

ik mufaffa gosht kā ruup diyā

zanjīreñ girdā-gird rahīñ

ik qahr-e-ġhazab kargas ab tak

kabhī merī āñkheñ nochte haiñ

kabhī un kī lahar-e-minqār se mere dil kī rageñ

ik ne kī hikāyat chheḌtī haiñ

jo mujh ko rihā.ī de aa kar

jo dard ko ḳhud mahsūs kare

vo aisī jagah ḳhvābīda hai

jahāñ sūraj bhī tārīk huā

kyā jāniye vo kab aa.egā

kab aa.egā kyā vāqa.ī aa.egā

main KHushbu jism samundar aankhon ka

ek KHwab chura kar laya tha

main aag chura kar laya tha

sahra-e-wajud ki tanhai us KHwab se kitni shadan thi

us aatish-e-larzan ki tabish taKHliq ki zau mein numayan thi

mera KHwab wo mera phul badan

mari aag mere farda ka chaman

main KHwabon se masrur raha

main aatish par maghrur raha

phir lahr uThi phir qahr hua mera KHwab hi mujh ko zahr hua

patthar ki chaTTanon par mujh ko

zanjiron se wabasta kiya

KHud aag bhi ek zanjir bani

zanjir bani shamshir bani

har qais ne mujh ko ye paigham diya

ye haal hamesha qaem hai is haal ka istiqbaal nahin

is haal ki chakki mein tum ko har lamhe piste rahna hai

tum kaise rihai paoge

aisa to koi paida na hua jo tum ko rihai de aa kar

tum KHwabon se masrur hue jo boya tha wo kaToge

sab apne kiye ki KHubi hai aamal ko apne bhugtoge

koi nind nahin koi KHwab nahin koi nur nahin koi nar nahin

fariyaad tumhaari boli hai alfaz tumhaare aahen hain

ek qahr-e-ghazab kargas ke liye

hai jism tumhaara dastarKHawan

wo dastarKHawan pe bikhri neamat se

mafluj-o-siyah jigar ki lazzat se

har lamhe lutf uThaega

har lamhe shor machaega

main KHushbu jism samundar aankhon ka

ek KHwab chura kar laya tha

main aag chura kar laya tha

patthar ki chaTanon ne mujh ko

ek mufaffa gosht ka rup diya

zanjiren girda-gird rahin

ek qahr-e-ghazab kargas ab tak

kabhi meri aankhen nochte hain

kabhi un ki lahar-e-minqar se mere dil ki ragen

ek ne ki hikayat chheDti hain

jo mujh ko rihai de aa kar

jo dard ko KHud mahsus kare

wo aisi jagah KHwabida hai

jahan suraj bhi tarik hua

kya jaaniye wo kab aaega

kab aaega kya waqai aaega