nazm

bībiyo

jannatī hai vo biivī jo shauhar ke aane se pahle

saje aur sañvre

mū-ba-mū motiyoñ ko piro.e

ishtihā-ḳhez ḳhushbū bhare qaab khānoñ ke tayyār rakkhe

roTiyāñ garm aur narm bistar kā ho ehtimām

āftābe

sard aur garm paanī ke maujūd hoñ

vahāñ na jaane use sard paanī kī ḳhvāhish ho yā garm kī

us kī ḳhvāhish kā koī bharosā nahīñ

taaki us kā majāzī ḳhudā us kā mālik jo aa.e

zarūrat kī har chiiz bin māñge paa.e

aur haañ bībiyo

ik chhaḌī bed kī ḳhuub mazbūt sī

vo bhī rakhnā na bhūle

kaun jaane sa'ūbat ke maidāñ kā haarā thakā vo sipāhī

shomī-e-baḳht se

nā-murādī ke zaḳhmoñ se lithḌā huā aa rahā ho

jo aa.e DhūñDne kī na zahmat uThā.e

nek biibī ke bechāra shānoñ se resham kā rangīñ labāda

us chhaḌī se haTā kar

apnī nākāmiyoñ kā lahū us ke shaffāf nāzuk badan par chhiḌak de

taaki phir chain kī niiñd vo so sake

haañ majāzī ḳhudā hai hotā sajda ḳhudā ke sivā gar kisī ko ravā to

usī ko ravā hai usī ne to tum ko bachā ke zamāne kī

dhūpoñ se ghar ke hisāroñ meñ mahfūz rakkhā us kī mehnat

ke paa.e hue rizq se hī to dāman tumhārā bharā

so mirī bībiyo jannatī hai vo biivī

jo shauhar kī ḳhvāhish pe jiitī rahī

din ko us ne kahā raat to us ne bhī raat samjhā

us kī ḳhātir vo mar-mar ke zinda rahī

us kī ḳhātir marī

sīdhī jannat sidhāregī pursish na hogī gunāhoñ kī

sab mu'āf hoñge

vaa'z meñ

kahne vaalī ne itnā kahā aur chup ho ga.ī

nek biibī kī baḳhshish kā muzhda sunāyā

magar aisā shauhar kahāñ jā.egā us kī bābat kisī ko na kuchh bhī batāyā

ḳhudāyā ḳhudāyā

saf-ba-saf nasl-dar-nasl be-mol kī ye kanīzeñ

inheñ un ke hone kā ehsās

tū hī 'atā kar

bibiyo

jannati hai wo biwi jo shauhar ke aane se pahle

saje aur sanwre

mu-ba-mu motiyon ko piroe

ishtiha-KHez KHushbu bhare qab khanon ke tayyar rakkhe

roTiyan garm aur narm bistar ka ho ehtimam

aaftabe

sard aur garm pani ke maujud hon

wahan na jaane use sard pani ki KHwahish ho ya garm ki

us ki KHwahish ka koi bharosa nahin

taki us ka majazi KHuda us ka malik jo aae

zarurat ki har chiz bin mange pae

aur han bibiyo

ek chhaDi bed ki KHub mazbut si

wo bhi rakhna na bhule

kaun jaane sa'ubat ke maidan ka haara thaka wo sipahi

shomi-e-baKHt se

na-muradi ke zaKHmon se lithDa hua aa raha ho

jo aae DhunDne ki na zahmat uThae

nek bibi ke bechaara shanon se resham ka rangin labaada

us chhaDi se haTa kar

apni nakaamiyon ka lahu us ke shaffaf nazuk badan par chhiDak de

taki phir chain ki nind wo so sake

han majazi KHuda hai hota sajda KHuda ke siwa gar kisi ko rawa to

usi ko rawa hai usi ne to tum ko bacha ke zamane ki

dhupon se ghar ke hisaron mein mahfuz rakkha us ki mehnat

ke pae hue rizq se hi to daman tumhaara bhara

so meri bibiyo jannati hai wo biwi

jo shauhar ki KHwahish pe jiti rahi

din ko us ne kaha raat to us ne bhi raat samjha

us ki KHatir wo mar-mar ke zinda rahi

us ki KHatir mari

sidhi jannat sidhaaregi pursish na hogi gunahon ki

sab mu'af honge

wa'z mein

kahne wali ne itna kaha aur chup ho gai

nek bibi ki baKHshish ka muzhda sunaya

magar aisa shauhar kahan jaega us ki babat kisi ko na kuchh bhi bataya

KHudaya KHudaya

saf-ba-saf nasl-dar-nasl be-mol ki ye kanizen

inhen un ke hone ka ehsas

tu hi 'ata kar