nazm

abhī kuchh din mujhe is shahr meñ āvāra rahnā hai

ki ab tak dil ko us bastī kī shāmeñ yaad aatī haiñ

jahāñ bele kī jhāḌī meñ kisī nāgin kī bāñbī thī

abhī tak dil ye kahtā hai ki us bastī meñ phir jaao

bharo dāman ko phūloñ se badan nāgin se Dasvāo

jahāñ ab huuñ vahāñ belā hai na nāgin kī bāñbī hai

isī kāran ye zālim dil mujhe uljhā.e rakhtā hai

isī kāran mujhe is shahr meñ āvāra rahnā hai

magar jis din ye rishta yaad kā TuuTā to phir us din

na dil hogā na ye ehsās hī ki dil bhī rakhte the

ki merī zaat meñ jo naag hai vo mujh ko Das legā

abhī kuchh din mujhe is shahr meñ āvāra rahnā hai

abhi kuchh din mujhe is shahr mein aawara rahna hai

ki ab tak dil ko us basti ki shamen yaad aati hain

jahan bele ki jhaDi mein kisi nagin ki banbi thi

abhi tak dil ye kahta hai ki us basti mein phir jao

bharo daman ko phulon se badan nagin se Daswao

jahan ab hun wahan bela hai na nagin ki banbi hai

isi karan ye zalim dil mujhe uljhae rakhta hai

isi karan mujhe is shahr mein aawara rahna hai

magar jis din ye rishta yaad ka TuTa to phir us din

na dil hoga na ye ehsas hi ki dil bhi rakhte the

ki meri zat mein jo nag hai wo mujh ko Das lega

abhi kuchh din mujhe is shahr mein aawara rahna hai