nazm

chhalak jaatī haiñ āñkheñ jab

bhī ham fariyād karte haiñ

vo din kyā phir na ā.eñge

jinheñ ham yaad karte haiñ

vo un kā pyaar vo shaiḳh-o-barahman yaad aate haiñ

kabhī ik shāḳh par the do

nasheman yaad aate haiñ

ḳhushī miltī thī us ko jo kisī ke kaam aatā thā

kisī kā dard le kar kis qadar

ārām aatā thā

vahī ham haiñ vahī tum ho

phir itnā fāsla kyoñ hai

sabhī kuchh ek hai to phir

ye dil se dil judā kyoñ hai

kabhī is mulk kī nazdīk se

tasvīr to dekho

kisī ke ḳhvāb kī TuuTī huī

ta.abīr to dekho

ḳhizāñ kā daur is dil ke

chaman se kaise niklegā

hamāre mulk kā sūraj gahan

se kaise niklegā

'suman' dars-e-mohabbat

yuuñ parinde ham ko dete haiñ

kabhī mandir meñ rahte haiñ

kabhī masjid meñ rahte haiñ

chhalak jati hain aankhen jab

bhi hum fariyaad karte hain

wo din kya phir na aaenge

jinhen hum yaad karte hain

wo un ka pyar wo shaiKH-o-barahman yaad aate hain

kabhi ek shaKH par the do

nasheman yaad aate hain

KHushi milti thi us ko jo kisi ke kaam aata tha

kisi ka dard le kar kis qadar

aaram aata tha

wahi hum hain wahi tum ho

phir itna fasla kyon hai

sabhi kuchh ek hai to phir

ye dil se dil juda kyon hai

kabhi is mulk ki nazdik se

taswir to dekho

kisi ke KHwab ki TuTi hui

tabir to dekho

KHizan ka daur is dil ke

chaman se kaise niklega

hamare mulk ka suraj gahan

se kaise niklega

'suman' dars-e-mohabbat

yun parinde hum ko dete hain

kabhi mandir mein rahte hain

kabhi masjid mein rahte hain