nazm-e-KHayal

nā-shunīda sā.atoñ kā muntazir huuñ

anginat guzre hue lamhoñ kī chīḳheñ

naḳhl-e-jāñ kī sabz shāḳhoñ meñ sarāyat kar chukī haiñ

mere andar ek hangāma bapā hai

ek aisī be-ḳhudī taarī hai mujh par

maiñ ugaltā jā rahā huuñ

be-panah zaḳhmī sadāoñ kī harārat

sochtā huuñ

apnī ye pur-shor hastī

ik ġhinā.ī chaap ko sunñe kī ḳhātir

be-panah zaḳhmī sadāoñ kī harārat sah rahī hai

yā mire maujūd kī hassās jihatoñ meñ musalsal

vaqt kā sī-murġh apne bādbāñ kī

saarī girheñ kholtā hī jā rahā hai

ḳhvāb-zār-e-vaqt meñ kitne hī be-sāmāñ sisyphus

nā-shunīda sā.atoñ kī sar-bulandī chāhte haiñ

jin kī āñkhoñ meñ abhī

nīñdoñ kī bārish ho rahī hai

aur ik koh-e-tasavvur kī bulandī

zaat ke gahrāv kī jānib luḌhaktī jā rahī hai

mere shānoñ ke kaTore jal uThe haiñ

maiñ ugaltā jā rahā huuñ

be-panah zaḳhmī sadāoñ kī harārat

na-shunida saaton ka muntazir hun

anginat guzre hue lamhon ki chiKHen

naKHl-e-jaan ki sabz shaKHon mein sarayat kar chuki hain

mere andar ek hangama bapa hai

ek aisi be-KHudi tari hai mujh par

main ugalta ja raha hun

be-panah zaKHmi sadaon ki hararat

sochta hun

apni ye pur-shor hasti

ek ghinai chap ko sunne ki KHatir

be-panah zaKHmi sadaon ki hararat sah rahi hai

ya mere maujud ki hassas jihaton mein musalsal

waqt ka si-murgh apne baadban ki

sari girhen kholta hi ja raha hai

KHwab-zar-e-waqt mein kitne hi be-saman sisyphus

na-shunida saaton ki sar-bulandi chahte hain

jin ki aankhon mein abhi

nindon ki barish ho rahi hai

aur ek koh-e-tasawwur ki bulandi

zat ke gahraw ki jaanib luDhakti ja rahi hai

mere shanon ke kaTore jal uThe hain

main ugalta ja raha hun

be-panah zaKHmi sadaon ki hararat