nazm kya hai

shā.irī kī do sinfeñ haiñ nazm-o-ġhazal

urdu meñ in kī shohrat hai bachcho aTal

nazm pāband hai nazm āzād bhī

ye kabhī nasr hai aur muarra kabhī

nazm-e-pāband meñ vazn hogā myaañ

aur āzād meñ bhī hai is kā nishāñ

nazm-e-pāband kā tarz hai jo latīf

is meñ pāoge tum qāfiya-o-radīf

nasrī nazmoñ meñ bas nasr hī nasr hai

vazn aur qāfiya hai na hī bahr hai

vazn aur qāfiye jin ko mushkil hue

nasrī nazmeñ umūman vo kahte lage

vazn nazm-e-muarra meñ hai dosto

is ko tum be-radīf-o-qavāfī kaho

masnavī ho qasīda ho yā marsiya

nazm kā miltā hai bachcho ham ko patā

nazm meñ silsila hai ḳhayālāt kā

ek dariyā sā hai dekho jazbāt kā

vo muḳhammas ho yā ho musaddas koī

ye bhī ik shakl hai nazm-e-pāband kī

vo ġhazal ho ki ho nazm bachcho suno

donoñ yaksāñ haiñ shohrat meñ bas jaan lo

'josh' kī nazmeñ mash.hūr haiñ har jagah

haiñ ġhazal ke 'jigar' vāqa.ī bādshah

nazm meñ jo kahānī kahī jā.egī

shauq se ai miyāñ vo sunī jā.egī

nazmeñ sīmāb-o-iqbāl ne bhī likhīñ

jo nihāyat hī mash.hūr sābit huiiñ

kartā huuñ bachchoñ ke vāste maiñ duā

nazmeñ bachchoñ kī likhtā huuñ 'hāfiz' sadā

shairi ki do sinfen hain nazm-o-ghazal

urdu mein in ki shohrat hai bachcho aTal

nazm paband hai nazm aazad bhi

ye kabhi nasr hai aur muarra kabhi

nazm-e-paband mein wazn hoga myan

aur aazad mein bhi hai is ka nishan

nazm-e-paband ka tarz hai jo latif

is mein paoge tum qafiya-o-radif

nasri nazmon mein bas nasr hi nasr hai

wazn aur qafiya hai na hi bahr hai

wazn aur qafiye jin ko mushkil hue

nasri nazmen umuman wo kahte lage

wazn nazm-e-muarra mein hai dosto

is ko tum be-radif-o-qawafi kaho

masnawi ho qasida ho ya marsiya

nazm ka milta hai bachcho hum ko pata

nazm mein silsila hai KHayalat ka

ek dariya sa hai dekho jazbaat ka

wo muKHammas ho ya ho musaddas koi

ye bhi ek shakl hai nazm-e-paband ki

wo ghazal ho ki ho nazm bachcho suno

donon yaksan hain shohrat mein bas jaan lo

'josh' ki nazmen mashhur hain har jagah

hain ghazal ke 'jigar' waqai baadshah

nazm mein jo kahani kahi jaegi

shauq se ai miyan wo suni jaegi

nazmen simab-o-iqbaal ne bhi likhin

jo nihayat hi mashhur sabit huin

karta hun bachchon ke waste main dua

nazmen bachchon ki likhta hun 'hafiz' sada