nazm

mere ḳhvāboñ meñ to har roz hī aa jaatī ho

apne ḳhvāboñ meñ bhī kyā mujh ko kabhī dekhā hai

maiñ tumheñ yaad har ik roz kiyā kartā huuñ

kyā mire baare meñ tum ne bhī kabhī sochā hai

tum se mansūb rahā naam mirā muddat tak

jo zamāne ne kahā maan liyā kartā huuñ

tum batāo bhī to kyā aur na batāo bhī to kyā

jo bhī kuchh dil meñ hai vo jaan liyā kartā huuñ

kyā mirī fikr meñ ġhamgīn huī ho tum bhī

maiñ to har shaam hī lagtā hai ki mar jaatā huuñ

kyā mire dard kā ehsās huā hai tum ko

kyoñ maiñ har roz bahut der se ghar jaatā huuñ

merī sāñsoñ meñ basī hai tirī ḳhushbū aise

jaise gulshan koī phūloñ se mahak uThtā hai

tum matā'-e-dil-o-duniyā ho mirī jaañ kī qasam

jab tumheñ dekhtā huuñ dekh ke ye lagtā hai

ġham nahīñ hai mujhe tum merī nahīñ ho saktī

maiñ kabhī bhī nahīñ is baat pe rone vaalā

tum hamesha mire is dil meñ rahogī jānāñ

ab mire saath yahāñ kuchh nahīñ hone vaalā

mere KHwabon mein to har roz hi aa jati ho

apne KHwabon mein bhi kya mujh ko kabhi dekha hai

main tumhein yaad har ek roz kiya karta hun

kya mere bare mein tum ne bhi kabhi socha hai

tum se mansub raha nam mera muddat tak

jo zamane ne kaha man liya karta hun

tum batao bhi to kya aur na batao bhi to kya

jo bhi kuchh dil mein hai wo jaan liya karta hun

kya meri fikr mein ghamgin hui ho tum bhi

main to har sham hi lagta hai ki mar jata hun

kya mere dard ka ehsas hua hai tum ko

kyon main har roz bahut der se ghar jata hun

meri sanson mein basi hai teri KHushbu aise

jaise gulshan koi phulon se mahak uThta hai

tum mata'-e-dil-o-duniya ho meri jaan ki qasam

jab tumhein dekhta hun dekh ke ye lagta hai

gham nahin hai mujhe tum meri nahin ho sakti

main kabhi bhi nahin is baat pe rone wala

tum hamesha mere is dil mein rahogi jaanan

ab mere sath yahan kuchh nahin hone wala