nazm

ghane peḌ shāḳhoñ pe baur aur ūñche pahāḌ

harī jhāḌiyāñ aur sabze kī moTī taheñ

saḌak ke kināroñ pe khamboñ ke taar havā se hileñ sarsarā.eñ

rasīle jhakoroñ meñ vo tez nashsha ki bas so hī jaa.eñ

kisī ek ko pyaas lag jaa.e to sab ke sab khelte muskurāte

nashebī chaTānoñ meñ bahte hue mīThe jharne kī jānib

chaleñ aur hāthoñ ke pyāle ko ik dūsre ke laboñ se lagā deñ

kabhī koī bus aa.e aur jo bhī utre ḳhulūs-o-mohabbat se ahvāl-pursī kare

aur asbāb sar par dhare gaañv kā rāsta le

kabhī koī charvāhā kañdhe pe lāThī rakhe aur hāthoñ ko lāThī pe laTkā.e

āhista āhista revaḌ liye guzre aur pūchhtā jaa.e

kyuuñ jī kahāñ jā rahe ho

kabhī duur ke khet se ik madhur taan uThe aur sab bhuul jaa.eñ

ki kyā kah rahe the

phir abbā nazar aa.eñ aur

kañkaroñ aur lakīroñ kī dil-chasp ma.asūm baazī ko sab bhuul jaa.eñ

koī ziin ghoḌe pe kasne lage koī sāmān uThā.e

shahr se aane vaale phaloñ kī mahak har taraf phail jaa.e

khilaunoñ kī jhankār dil meñ ajab gudgudī sī machā.e

havelī ke chobī munaqqash baḌe dar pe daadī khaḌī muntazir hoñ

nāshta kab se tayyār hai

aaTh bajne ko haiñ aaj office nahīñ

jā.eñge kyā

ghane peD shaKHon pe baur aur unche pahaD

hari jhaDiyan aur sabze ki moTi tahen

saDak ke kinaron pe khambon ke tar hawa se hilen sarsaraen

rasile jhakoron mein wo tez nashsha ki bas so hi jaen

kisi ek ko pyas lag jae to sab ke sab khelte muskuraate

nashebi chaTanon mein bahte hue miThe jharne ki jaanib

chalen aur hathon ke pyale ko ek dusre ke labon se laga den

kabhi koi bus aae aur jo bhi utre KHulus-o-mohabbat se ahwal-pursi kare

aur asbab sar par dhare ganw ka rasta le

kabhi koi charwaha kandhe pe laThi rakhe aur hathon ko laThi pe laTkae

aahista aahista rewaD liye guzre aur puchhta jae

kyun ji kahan ja rahe ho

kabhi dur ke khet se ek madhur tan uThe aur sab bhul jaen

ki kya kah rahe the

phir abba nazar aaen aur

kankaron aur lakiron ki dil-chasp masum bazi ko sab bhul jaen

koi zin ghoDe pe kasne lage koi saman uThae

shahr se aane wale phalon ki mahak har taraf phail jae

khilaunon ki jhankar dil mein ajab gudgudi si machae

haweli ke chobi munaqqash baDe dar pe dadi khaDi muntazir hon

nashta kab se tayyar hai

aaTh bajne ko hain aaj office nahin

jaenge kya