nazm

safed shirt thī tum sīḌhiyoñ pe baiThe the

maiñ jab class se niklī thī muskurāte hue

hamārī pahlī mulāqāt yaad hai nā tumheñ

ishāre karte the tum mujh ko aate jaate hue

tamām raat vo āñkheñ na bhūltī thiiñ mujhe

ki jin meñ mere liye 'izzat aur vaqār dikhe

mujhe ye duniyā bayābān thī magar ik din

tum ek baar dikhe aur be-shumār dikhe

mujhe ye Dar thā ki tum bhī kahīñ vahī to nahīñ

jo jism par hī tamanna ke daaġh chhoḌte haiñ

ḳhudā kā shukr hai ki tum un se muḳhtalif nikle

jo phuul toḌ ke ġhusse meñ baaġh chhoḌte haiñ

ziyāda vaqt na guzrā thā is ta'alluq ko

ki is ke baa'd vo lamha qarīñ qarīñ aaya

chhuā thā tum ne mujhe aur mujhe mohabbat par

yaqīn aaya thā lekin kabhī nahīñ aaya

phir us ke baa'd merā nashsha-e-sukūt gayā

maiñ kashmakash meñ thī tum mere kaun lagte ho

maiñ amritā tumheñ sochūñ to mere sāhir ho

maiñ fārehā tumheñ dekhūñ to jaun lagte ho

ham ek saath rahe aur hameñ pata na chalā

ta'alluqāt kī had-bandiyāñ bhī hotī haiñ

mohabbatoñ ke safar meñ jo rāste haiñ vahī

havas kī samt meñ pagDañDiyāñ bhī hotī haiñ

tumhāre vāste jo mere dil meñ hai 'hāfī'

tumheñ maiñ kaash ye sab kuchh kabhī batā paatī

aur ab mazīd na milne kī koī vaj.h nahīñ

bas apnī maañ se maiñ āñkheñ nahīñ milā paatī

safed shirt thi tum siDhiyon pe baiThe the

main jab class se nikli thi muskuraate hue

hamari pahli mulaqat yaad hai na tumhein

ishaare karte the tum mujh ko aate jate hue

tamam raat wo aankhen na bhulti thin mujhe

ki jin mein mere liye 'izzat aur waqar dikhe

mujhe ye duniya bayaban thi magar ek din

tum ek bar dikhe aur be-shumar dikhe

mujhe ye Dar tha ki tum bhi kahin wahi to nahin

jo jism par hi tamanna ke dagh chhoDte hain

KHuda ka shukr hai ki tum un se muKHtalif nikle

jo phul toD ke ghusse mein bagh chhoDte hain

ziyaada waqt na guzra tha is ta'alluq ko

ki is ke ba'd wo lamha qarin qarin aaya

chhua tha tum ne mujhe aur mujhe mohabbat par

yaqin aaya tha lekin kabhi nahin aaya

phir us ke ba'd mera nashsha-e-sukut gaya

main kashmakash mein thi tum mere kaun lagte ho

main amrita tumhein sochun to mere sahir ho

main fareha tumhein dekhun to jaun lagte ho

hum ek sath rahe aur hamein pata na chala

ta'alluqat ki had-bandiyan bhi hoti hain

mohabbaton ke safar mein jo raste hain wahi

hawas ki samt mein pagDanDiyan bhi hoti hain

tumhaare waste jo mere dil mein hai 'hafi'

tumhein main kash ye sab kuchh kabhi bata pati

aur ab mazid na milne ki koi wajh nahin

bas apni man se main aankhen nahin mila pati