nazm

tumhārī qurbat meñ biitā vaqfa

ḳhumār ban kar mire tanaffus meñ be-tahāsha mahak rahā hai

tumhārī sāda-dilī ne dil kī tamām duniyā pe hashr barpā kiyā huā hai

kisī bhī jānib nazar uThā.ūñ

tumhārī gahrī chamaktī āñkhoñ kā aks

merī udaas āñkhoñ meñ kauñdtā hai

ye aks sach bhī hai ḳhvāb bhī hai

ye aks misl-e-sarāb bhī hai

maiñ is tamāshe se tang aakar jo apnī palkoñ pe haath rakh luuñ to dekhtī huuñ

ki lams ab tak tumhāre hāthoñ kā mere hāthoñ kī uñgliyoñ se guthā huā hai

ye lams ātish hai aab bhī hai

ye lams misl-e-azāb bhī hai

mujhe ḳhabar hai ki merī vahshat haq aur bātil kī ain sarhad pe aa rukī hai

mirī mohabbat ke paak dāman pe daaġh lagne meñ bas ek nuqte kī hī kamī hai

aur aisī nāzuk ghaḌī meñ jab ki ghaḌī kī sāñseñ bhī

apnā rastā bhaTak rahī haiñ mujhe pata hai

ki meñ jo bhaTkī rah-e-vafā se

to phir jahāñ meñ sivā fareboñ ke kyā bachegā

kahāñ bachegī koī sadāqat

koī bharosa kahāñ bachegā

so chāhtī huuñ

ye saarā vaqfa jo mujh ko ḳhvāboñ sā lag rahā hai vo ḳhvāb hī ho

ye saarā vaqfa ki jis pe sach kā vahm hai mujh ko sarāb hī ho

tumhaari qurbat mein bita waqfa

KHumar ban kar mere tanaffus mein be-tahasha mahak raha hai

tumhaari sada-dili ne dil ki tamam duniya pe hashr barpa kiya hua hai

kisi bhi jaanib nazar uThaun

tumhaari gahri chamakti aankhon ka aks

meri udas aankhon mein kaundta hai

ye aks sach bhi hai KHwab bhi hai

ye aks misl-e-sarab bhi hai

main is tamashe se tang aakar jo apni palkon pe hath rakh lun to dekhti hun

ki lams ab tak tumhaare hathon ka mere hathon ki ungliyon se gutha hua hai

ye lams aatish hai aab bhi hai

ye lams misl-e-azab bhi hai

mujhe KHabar hai ki meri wahshat haq aur baatil ki ain sarhad pe aa ruki hai

meri mohabbat ke pak daman pe dagh lagne mein bas ek nuqte ki hi kami hai

aur aisi nazuk ghaDi mein jab ki ghaDi ki sansen bhi

apna rasta bhaTak rahi hain mujhe pata hai

ki mein jo bhaTki rah-e-wafa se

to phir jahan mein siwa farebon ke kya bachega

kahan bachegi koi sadaqat

koi bharosa kahan bachega

so chahti hun

ye sara waqfa jo mujh ko KHwabon sa lag raha hai wo KHwab hi ho

ye sara waqfa ki jis pe sach ka wahm hai mujh ko sarab hi ho