nazm

mere ḳhayāl meñ vo aurat

duniyā kī lazīz-tarīn aurat hai

maiñ us ke andar ġharq ho jā.ūñgā

vo mujhe duur duur se

apnā aap dikhātī hai

mere andar bhuuk aur pyaas ko bedār kartī hai

aur jab maiñ ḳhvāhish kī aag meñ jalne lagtā huuñ

vo itmīnān se hañsne lagtī hai

merā jī chāhtā hai ki maiñ us ko khā jā.ūñ

maiñ us ko puure kā puurā nigal jaanā chāhtā huuñ

jab maiñ us kī taraf baḌhtā huuñ

vo mujhe DaañT kar bhagā detī hai

aur maiñ dard se taḌap uThtā huuñ

aur maiñ tanhā.ī meñ aa kar rotā huuñ

aur maiñ musalsal rotā hī rahtā huuñ

jab us se judā.ī kā dard merī bardāsht se bāhar ho jaatā hai

maiñ ek baar phir us ke paas jaatā huuñ

aur vo kahtī hai: are tum kahāñ the?

muddat se dikhā.ī nahīñ diye

aur ek baar phir

us kī adāoñ kā jaadū mujh par chhā jaatā hai

is ke jism kī kashish mujhe mad.hosh kar detī hai

maiñ pāgaloñ kī tarah use ghūrne lagtā huuñ

maiñ apnī āñkhoñ se us ko chūmtā aur chāTtā huuñ

maiñ apnī āñkhoñ se us ko khātā rahtā huuñ

aur vo ḳhāmoshī se sab kuchh dekhtī rahtī hai

jab maiñ be-tāb ho jaatā huuñ

to achānak vo ġhusse meñ aa jaatī hai

vo mujh se nārāz ho jaatī hai

aur maiñ ek dhutkāre hue kutte kī tarah

apnī tanhā.ī meñ vāpas aa jaatā huuñ

apnī bebasī par aañsū bahāne ke liye

aur maiñ musalsal rotā hī rahtā huuñ

mere ḳhayāl meñ vo aurat

duniyā kī zālim-tarīn aurat hai

aur maiñ us aurat se mohabbat kartā huuñ

maiñ us ke andar ġharq ho jā.ūñgā

mere KHayal mein wo aurat

duniya ki laziz-tarin aurat hai

main us ke andar gharq ho jaunga

wo mujhe dur dur se

apna aap dikhati hai

mere andar bhuk aur pyas ko bedar karti hai

aur jab main KHwahish ki aag mein jalne lagta hun

wo itminan se hansne lagti hai

mera ji chahta hai ki main us ko kha jaun

main us ko pure ka pura nigal jaana chahta hun

jab main us ki taraf baDhta hun

wo mujhe DanT kar bhaga deti hai

aur main dard se taDap uThta hun

aur main tanhai mein aa kar rota hun

aur main musalsal rota hi rahta hun

jab us se judai ka dard meri bardasht se bahar ho jata hai

main ek bar phir us ke pas jata hun

aur wo kahti hai: are tum kahan the?

muddat se dikhai nahin diye

aur ek bar phir

us ki adaon ka jadu mujh par chha jata hai

is ke jism ki kashish mujhe madhosh kar deti hai

main pagalon ki tarah use ghurne lagta hun

main apni aankhon se us ko chumta aur chaTta hun

main apni aankhon se us ko khata rahta hun

aur wo KHamoshi se sab kuchh dekhti rahti hai

jab main be-tab ho jata hun

to achanak wo ghusse mein aa jati hai

wo mujh se naraaz ho jati hai

aur main ek dhutkare hue kutte ki tarah

apni tanhai mein wapas aa jata hun

apni bebasi par aansu bahane ke liye

aur main musalsal rota hi rahta hun

mere KHayal mein wo aurat

duniya ki zalim-tarin aurat hai

aur main us aurat se mohabbat karta hun

main us ke andar gharq ho jaunga