nili jild ki kitab

mere ghar meñ jhoñj banā.e gaurayyā kā joḌā

choñch meñ le kar aa.e jaa.e bhūsa thoḌā thoḌā

bhūse meñ kuchh tinke bhī haiñ kuchh maTiyāle par

niile piile ujle maile bhūre kaale par

bāġhoñ bāġhoñ ho kar aa.e apnā ghar na bhūle

pahle vo rassī par baiThe pal bhar jhūlā jhūle

phir almārī meñ uḌ kar jaa.e sīdhe apne kone

ġhālib kā dīvān chunā hai rahne ko in do ne

niilī niilī jild pe jaise phuul rakhā ho koī

yā kāġhaz ko raat samajh kar chāñd ugā ho koī

qismat vaale Thahre un ke laal gulābī panje

urdu kā ik shā.er aayā un ke paañv ke nīche

chāñdī jaise taḳht pe so kar guzrīñ rāteñ un kī

'ġhālib'-sāhib sunte hoñge shāyad bāteñ un kī

maazī kī buniyād pe rakkhā hai mustaqbil sab kā

aane vaale daur meñ logo aTkā hai dil sab kā

gaurayyā ke in ḳhvāboñ ko kaise toḌā jaa.e

koī nusḳha aur mañgā leñ is ko chhoḌā jaa.e

mere ghar mein jhonj banae gaurayya ka joDa

chonch mein le kar aae jae bhusa thoDa thoDa

bhuse mein kuchh tinke bhi hain kuchh maTiyale par

nile pile ujle maile bhure kale par

baghon baghon ho kar aae apna ghar na bhule

pahle wo rassi par baiThe pal bhar jhula jhule

phir almari mein uD kar jae sidhe apne kone

ghaalib ka diwan chuna hai rahne ko in do ne

nili nili jild pe jaise phul rakha ho koi

ya kaghaz ko raat samajh kar chand uga ho koi

qismat wale Thahre un ke lal gulabi panje

urdu ka ek shaer aaya un ke panw ke niche

chandi jaise taKHt pe so kar guzrin raaten un ki

'ghaalib'-sahib sunte honge shayad baaten un ki

mazi ki buniyaad pe rakkha hai mustaqbil sab ka

aane wale daur mein logo aTka hai dil sab ka

gaurayya ke in KHwabon ko kaise toDa jae

koi nusKHa aur manga len is ko chhoDa jae