nind pyari nind

jab khulī āñkhoñ se apne ās-pās

dekhtā huuñ apnī duniyā kis qadar mahdūd-o-tañg

aur phir

ik jāgte lamhe meñ maiñ

band kar letā huuñ apnī aañkh aur

dekhtā huuñ sāmne phailā huā ik jahān-e-be-kanār

dekhtā huuñ apnī hī āñkhoñ se vo saare manāzir

shahr aur ābādiyāñ

saikḌoñ sadiyoñ se jo mahfūz haiñ

kis ko dekhūñ kis ko chhoḌūñ

aisī ik duniyā na jis kā or-chhor

na to samteñ aur hadeñ

aur ufuq nāpaid, ġhā.eb āsmāñ

sochtā huuñ aah merā ye safar kitnā tavīl

fāsle itne ki un kī ab koī manzil nahīñ

tai karūñgā aur thak jā.ūñgā maiñ

aur merī niiñd rūThī hī rahegī taaki maiñ ārām luuñ

khaul detā huuñ ye āñkheñ

aur ab ḳhush huuñ chalo fursat milī is muft kī begār se

kyā batā.ūñ mere andar se us dam

do na.ī āñkheñ nikal kar

merī āñkhoñ kī jagah letī haiñ

phir pahuñch jaatā huuñ us duniyā meñ

jis se bhaag kar aayā thā maiñ

phir vahī saare manāzir shahr aur ābādiyāñ

jaise ik aaseb ban kar mere sar pe chhā ga.iiñ

aah mujh ko khā ga.iiñ

kaash koī vo khulī āñkheñ mujhe vāpas dilā de

maiñ hamesha ke liye ban jā.ūñgā us shaḳhs kā

aaj tak vo shaḳhs merī aañkh se ojhal hai, maiñ

maut tak kyā so sakūñgā

maut hī vo apnī pyārī niiñd hai

jo hamesha ke liye apne musāfir ko sulātī hai

use tohfa atā kartī hai

jis ko ham kabhī ārām kahte kabhī amn-o-sukūñ

maiñ usī kī kaalī zulfoñ kā asiir

maiñ usī apnī dulhan kā muntazir huuñ

jab khuli aankhon se apne aas-pas

dekhta hun apni duniya kis qadar mahdud-o-tang

aur phir

ek jagte lamhe mein main

band kar leta hun apni aankh aur

dekhta hun samne phaila hua ek jahan-e-be-kanar

dekhta hun apni hi aankhon se wo sare manazir

shahr aur aabaadiyan

saikDon sadiyon se jo mahfuz hain

kis ko dekhun kis ko chhoDun

aisi ek duniya na jis ka or-chhor

na to samten aur haden

aur ufuq napaid, ghaeb aasman

sochta hun aah mera ye safar kitna tawil

fasle itne ki un ki ab koi manzil nahin

tai karunga aur thak jaunga main

aur meri nind ruThi hi rahegi taki main aaram lun

khaul deta hun ye aankhen

aur ab KHush hun chalo fursat mili is muft ki begar se

kya bataun mere andar se us dam

do nai aankhen nikal kar

meri aankhon ki jagah leti hain

phir pahunch jata hun us duniya mein

jis se bhag kar aaya tha main

phir wahi sare manazir shahr aur aabaadiyan

jaise ek aaseb ban kar mere sar pe chha gain

aah mujh ko kha gain

kash koi wo khuli aankhen mujhe wapas dila de

main hamesha ke liye ban jaunga us shaKHs ka

aaj tak wo shaKHs meri aankh se ojhal hai, main

maut tak kya so sakunga

maut hi wo apni pyari nind hai

jo hamesha ke liye apne musafir ko sulati hai

use tohfa ata karti hai

jis ko hum kabhi aaram kahte kabhi amn-o-sukun

main usi ki kali zulfon ka asir

main usi apni dulhan ka muntazir hun