nind se chaunko

gahrī niiñd se sone vaalo

vaqt ko apne khone vaalo

raat kaTī kuchh tum ko ḳhabar hai

chauñko chauñko vaqt-e-sahar hai

chāñd kī rangat ho ga.ī mailī

dekho chamak sūraj kī phailī

chalte haiñ jhoñke sard havā ke

jhuum rahe haiñ phuul itrā ke

koyaleñ kūkeñ kū kū kū kū

yaahū bole yaahū yaahū

niiñd se chauñkeñ pankh pakherū

bol rahe haiñ shāḳhoñ pe har sū

bhūle hue haiñ is dam sab dhun

laal pukāre summun bukmun

khil ga.iiñ kaliyāñ baaġh kī saarī

chaar taraf haiñ nahreñ jaarī

go ki abhī tak kuchh hai añdherā

chiḌiyāñ lene aa.iiñ baserā

gaa.eñ duub ko charne aa.iiñ

bhaiñsoñ ne apnī shakleñ dikhā.īñ

ruk gayā is dam bahtā dariyā

duur talak shaffāf hai sahrā

uTTho uTTho ahmad uTTho

muñh ko dho kar kapḌe pahan lo

sair karo maidāñ kī nikal kar

phuul ko dekho baaġh meñ chal kar

vaqt ko khonā zulm hai pyāre

sun ye nasīhat dost hamāre

gahri nind se sone walo

waqt ko apne khone walo

raat kaTi kuchh tum ko KHabar hai

chaunko chaunko waqt-e-sahar hai

chand ki rangat ho gai maili

dekho chamak suraj ki phaili

chalte hain jhonke sard hawa ke

jhum rahe hain phul itra ke

koyalen kuken ku ku ku ku

yahu bole yahu yahu

nind se chaunken pankh pakheru

bol rahe hain shaKHon pe har su

bhule hue hain is dam sab dhun

lal pukare summun bukmun

khil gain kaliyan bagh ki sari

chaar taraf hain nahren jari

go ki abhi tak kuchh hai andhera

chiDiyan lene aain basera

gaen dub ko charne aain

bhainson ne apni shaklen dikhain

ruk gaya is dam bahta dariya

dur talak shaffaf hai sahra

uTTho uTTho ahmad uTTho

munh ko dho kar kapDe pahan lo

sair karo maidan ki nikal kar

phul ko dekho bagh mein chal kar

waqt ko khona zulm hai pyare

sun ye nasihat dost hamare