nind se KHwab tak

rāste gavāh ho ga.e haiñ

tere palaT kar dekhne kā andāz

havā ke tez jhoñke se lapak jaane vaalī shāḳh se mushābah hai

ek khanaktī huī muskān rah-rah kar nigāhoñ meñ gūñjtī hai

ek sitāra ḳhalāoñ se zamīn par aa girtā hai

siyāh raat yakāyak nuur se mā'mūr shabistāñ kā havāla ban jaatī hai

lihāf ke haT jaane se

mausam kī ḳhunkī ragoñ meñ garm lahū kī dhāroñ ko

munjamid karne lagī hai

aur saare manzar dhuñdlā ga.e haiñ

aañkh meñ kaḌvāhaToñ kā zahr utarne lagā hai

ye ḳhvāb apne reshmī libādoñ meñ

kaise ḳhārzār ban ke laayā hai

niiñd mushkil se aatī hai aa.ī thī lekin

kisī ḳhvāb kī āhaToñ se chauñk kar

kamre ke darvāze par saham sī ga.ī hai

aur maiñ aañkh khole hue

ḳhālī kamre kī chhat tak rahā huuñ

raste gawah ho gae hain

tere palaT kar dekhne ka andaz

hawa ke tez jhonke se lapak jaane wali shaKH se mushabah hai

ek khanakti hui muskan rah-rah kar nigahon mein gunjti hai

ek sitara KHalaon se zamin par aa girta hai

siyah raat yakayak nur se ma'mur shabistan ka hawala ban jati hai

lihaf ke haT jaane se

mausam ki KHunki ragon mein garm lahu ki dhaaron ko

munjamid karne lagi hai

aur sare manzar dhundla gae hain

aankh mein kaDwahaTon ka zahr utarne laga hai

ye KHwab apne reshmi libaadon mein

kaise KHarzar ban ke laya hai

nind mushkil se aati hai aai thi lekin

kisi KHwab ki aahaTon se chaunk kar

kamre ke darwaze par saham si gai hai

aur main aankh khole hue

KHali kamre ki chhat tak raha hun