nirwan

mirī saañs kā silsila

aise TuuTe ki ik mast jhoñke ke mānind girtī luḌhaktī huī umr merī

harī lāñbī maḳhmal sī ḳhushbū bharī ghaas meñ

apne nañge badan ko utāre

na aañsū girā.e na dāman pasāre

faqat haath ke al-vidā.ī ishāre se

apne ta.āqub meñ aate parindoñ ko ruḳhsat kare

aur ḳhud ghaas kī jhiil meñ Duub jaa.e

mirī saañs kā silsila

yuuñ na TuuTe ki ik tund jhoñke ke mānind uḌtī huī umr merī

kisī band ujḌe hue shahr meñ daf.atan ḳhud ko paa.e

bhayānak ḳhamoshī kā ik Doltā qahqaha

us kī rag rag meñ utre to vo baukhlā.e

qatāroñ meñ leTī huī murda galiyoñ meñ bhaTke

makānoñ meñ utre muñDeroñ pe aa.e

siyah chhoTī īñToñ kī farsūda dīvār ko apnī poroñ se chhū kar

koī dar DhūñDe koī raah māñge

achānak kisī sard khambe kī be-nūr āñkhoñ se jhāñke

baḌe karb se giḌgiḌā.e

ḳhudārā koī mujh ko bāhar nikalne kā rasta batā.e

ḳhudārā koī mujh ko bāhar nikalne kā rasta batā.e

meri sans ka silsila

aise TuTe ki ek mast jhonke ke manind girti luDhakti hui umr meri

hari lanbi maKHmal si KHushbu bhari ghas mein

apne nange badan ko utare

na aansu girae na daman pasare

faqat hath ke al-widai ishaare se

apne taaqub mein aate parindon ko ruKHsat kare

aur KHud ghas ki jhil mein Dub jae

meri sans ka silsila

yun na TuTe ki ek tund jhonke ke manind uDti hui umr meri

kisi band ujDe hue shahr mein dafatan KHud ko pae

bhayanak KHamoshi ka ek Dolta qahqaha

us ki rag rag mein utre to wo baukhlae

qataron mein leTi hui murda galiyon mein bhaTke

makanon mein utre munDeron pe aae

siyah chhoTi inTon ki farsuda diwar ko apni poron se chhu kar

koi dar DhunDe koi rah mange

achanak kisi sard khambe ki be-nur aankhon se jhanke

baDe karb se giDgiDae

KHudara koi mujh ko bahar nikalne ka rasta batae

KHudara koi mujh ko bahar nikalne ka rasta batae