nizam-e-shamsi

ghūmnā har ek kī pahlī pasand

is liye Daalā sitāroñ ye kamand

ham haiñ bachche kyā hamārā pūchhnā

kis qadar ham chāhte haiñ ghūmnā

is jagah jo koī rahtā hai paḌā

us ko kahiye be-khaTak pāgal baḌā

ye zamīñ ye chāñd ye sūraj sabhī

ghūmnā hai in kī aslī zindagī

roz puurā ek chakkar ye zamīñ

kar liyā kartī hai kar liije yaqīñ

is kī gardish meñ chhupā hai rāt-o-din

is ko haftoñ aur mahīnoñ meñ to gin

aur sitāre bhī haiñ saare ghūmte

vo ḳhushī meñ chal rahe haiñ jhūmte

haiñ kavākib ke bhī kuchh taabe nujūm

kah rahe haiñ aisā as.hāb-e-ulūm

vo bhī gardish meñ rahā karte haiñ mast

in ko kah sakte haiñ ham gardish-parast

ye atārid zohra ye mirrīḳh bhī

ye zuhal uranus aur ye mushtarī

chaar pushtoñ se nahīñ sayyāhī meñ

umr guzrī hai isī tairākī meñ

aur hazāroñ haiñ abhī sayyārche

ghūmte haiñ jo ḳhudā ke hukm se

hai anokhā sab kā sab shamsī nizām

sochiye kitnā hai ūñchā rab kā naam

ye nizām-e-shamsī ruk jaa.e agar

kaam se ho jaa.e thoḌā be-ḳhabar

phir ye duniyā kā jo chaltā hai nizām

dekh lenā sab bigaḌ jā.egā kaam

is liye ai bachcho tum bhī kaam sab

kar ke puurā karnā phir ārām tab

ghumna har ek ki pahli pasand

is liye Dala sitaron ye kamand

hum hain bachche kya hamara puchhna

kis qadar hum chahte hain ghumna

is jagah jo koi rahta hai paDa

us ko kahiye be-khaTak pagal baDa

ye zamin ye chand ye suraj sabhi

ghumna hai in ki asli zindagi

roz pura ek chakkar ye zamin

kar liya karti hai kar lije yaqin

is ki gardish mein chhupa hai raat-o-din

is ko hafton aur mahinon mein to gin

aur sitare bhi hain sare ghumte

wo KHushi mein chal rahe hain jhumte

hain kawakib ke bhi kuchh tabe nujum

kah rahe hain aisa ashab-e-ulum

wo bhi gardish mein raha karte hain mast

in ko kah sakte hain hum gardish-parast

ye atarid zohra ye mirriKH bhi

ye zuhal uranus aur ye mushtari

chaar pushton se nahin sayyahi mein

umr guzri hai isi tairaki mein

aur hazaron hain abhi sayyarche

ghumte hain jo KHuda ke hukm se

hai anokha sab ka sab shamsi nizam

sochiye kitna hai uncha rab ka nam

ye nizam-e-shamsi ruk jae agar

kaam se ho jae thoDa be-KHabar

phir ye duniya ka jo chalta hai nizam

dekh lena sab bigaD jaega kaam

is liye ai bachcho tum bhi kaam sab

kar ke pura karna phir aaram tab