nukta

duniyā ko haqīqat ke ujāloñ se sajā.eñ

goshoñ meñ samo deñ ruḳh-e-tanvīr-e-mohabbat

ehsās ke hoñToñ pe rakheñ sā.at-e-naġhma

har aks ko mil jaa.e sarāpe kī rifāqat

andāz bhī faanī shab-e-gulnār bhī faanī

hangāma-e-pur-shauq kī dastak bhī nahīñ hai

lab bhuul chuke phuul khilāne kā salīqa

is baat meñ logoñ ko koī shak bhī nahīñ hai

jo Thokareñ khaa.e use nādān kaheñ sab

haañ pair phisal jaa.e to rāhoñ kī ḳhatā kyā

laġhzish to har ik aañkh kī taqdīr hai shāyad

manzil ko magar hādsa-e-ġham kā pata kyā

rāhoñ meñ bichhā dī haiñ ḳhayālāt kī palkeñ

lamhoñ kī tarah muntazir-e-dīd khaḌā huuñ

āñkhoñ meñ jalā.e hue ḳhurshīd khaḌā huuñ

vo aane hī vaalī hai chalo aa hī ga.ī vo

bārish lab-o-ruḳhsār pe barsā hī ga.ī vo

ḳhushbū kī tarah ruuh pe lahrā hī ga.ī vo

mafhūm-e-rifāqat mujhe samjhā hī ga.ī vo

lekin ye tasavvur ke hasīñ aks haiñ shāyad

jhoñke se havā ke koī pattā nahīñ khaḌkā

dastak se dar-e-shauq kī dhaḌkan kahāñ chauñkī

sargoshī se sāñsoñ meñ kahāñ itr ghulā hai

sākit hai abhī tak kahāñ darvāza khulā hai

chehre pe numāyāñ koī dhuñdlā.ī kiran hai

mahkā na javāñ hoñToñ pe ash.ār kā saaya

bikhrī na koī zulf na raushan huiiñ rāteñ

maiñ so gayā kar ke dil-e-zār se bāteñ

duniya ko haqiqat ke ujalon se sajaen

goshon mein samo den ruKH-e-tanwir-e-mohabbat

ehsas ke honTon pe rakhen saat-e-naghma

har aks ko mil jae sarape ki rifaqat

andaz bhi fani shab-e-gulnar bhi fani

hangama-e-pur-shauq ki dastak bhi nahin hai

lab bhul chuke phul khilane ka saliqa

is baat mein logon ko koi shak bhi nahin hai

jo Thokaren khae use nadan kahen sab

han pair phisal jae to rahon ki KHata kya

laghzish to har ek aankh ki taqdir hai shayad

manzil ko magar hadsa-e-gham ka pata kya

rahon mein bichha di hain KHayalat ki palken

lamhon ki tarah muntazir-e-did khaDa hun

aankhon mein jalae hue KHurshid khaDa hun

wo aane hi wali hai chalo aa hi gai wo

barish lab-o-ruKHsar pe barsa hi gai wo

KHushbu ki tarah ruh pe lahra hi gai wo

mafhum-e-rifaqat mujhe samjha hi gai wo

lekin ye tasawwur ke hasin aks hain shayad

jhonke se hawa ke koi patta nahin khaDka

dastak se dar-e-shauq ki dhaDkan kahan chaunki

sargoshi se sanson mein kahan itr ghula hai

sakit hai abhi tak kahan darwaza khula hai

chehre pe numayan koi dhundlai kiran hai

mahka na jawan honTon pe ashaar ka saya

bikhri na koi zulf na raushan huin raaten

main so gaya kar ke dil-e-zar se baaten