nuqush-e-mazi

Jameel Mazhari

nuqush-e-mazi

Jameel Mazhari

MORE BYJameel Mazhari

    nazar meñ shā.er ke phir rahā hai, harā-bharā pur-bahār jañgal

    vo sub.h-e-rañgīñ, vo kaif-e-manzar, vo dāman-e-koh bindhiyā-chal

    milī thī ik rañg-o-bū duniyā, tamām sahrā chaman chaman thā

    magar vo jannat-nigāh vaadī bahār mustaqil vatan thā

    khaḌā huā thā ġharīb shā.er, ḳhamosh sahra-e-rañg-o-bū meñ

    machal rahī thī sahar doshīza shab ke āġhosh-e-ārzū meñ

    hoñ chashm-e-āshiq meñ jaise āñsū, sitāre yuuñ jhilmilā rahe the

    falak pe barham thī bazm-e-anjum, charāġh gul hote rahe the

    tajalliyoñ falak se bārish thii, zulmat-e-shab bikhar rahī thī

    ki sub.h sāñvlī hasīna nahā rahī thii, nikhar rahī thī

    nadī meñ halkā thā tamavvuj kaheñ jise be-qarār ġhaflat

    ki niiñd meñ jaise karvaTeñ le, javān, bad-mast-e-ḳhvāb aurat

    havā jo shāna hilā rahī thii, to maujeñ hushiyār ho rahī thiiñ

    tuyūr ke mast zamzamoñ se fazā.eñ bedār ho rahī thiiñ

    ye kaifiyat thī aur ek jogan sitār baiThī bajā rahī thī

    magar vo jañgal shāhzādī bahār ke giit rahī thī

    bahār ke giit rahī thī fazā meñ naġhme bikhertī thī

    sukūt fitrat daad detā thā ruḳh jidhar ko vo phertī thī

    vo niiñd se muzmahil nigāheñ vo lab pe maġhmūm muskurāhaT

    hazār andāz-e-dil-rubā.ī aur ek ma.asūm muskurāhaT

    thiiñ niiñd se rasmasā.ī āñkheñ aur in meñ shoḳhī machal rahī thī

    ḳhumār-ālūda añkhḌiyoñ meñ bahār ruuh pal rahī thī

    qamar tal.at, shafaq surḳhī, jabīñ pe sub.h-e-bahār ḳhandāñ

    nigāh ā.īna-dār-e-manzar, jamāl parvarda-e-byābāñ

    sitār pe nāzuk uñgliyāñ thīñ, kalā.ī gorī lachak rahī thī

    umañgeñ letī thiiñ dil meñ karvaT, rag-e-javānī phaḌak rahī thī

    sunahre jalvoñ chhūT Daalī jo shāh-e-ḳhāvar ke tāj-e-zar ne

    talā.ī afshāñ chunī jabīñ par malīh doshīza-e-sahar ne

    talā.ī zevar se aur chamkī urūs-e-manzar dilrubā.ī

    uThā jo sūraj to dhuup niklī hasīna-e-subh khilkilā.ī

    fazā tabdīliyoñ ko dekhā jo bazm-e-fitrat mutriba ne

    sitār rakkhā, uThā.ī gagrī, nadī kināre chalī nahāne

    vo rahī thī nadī jānib maiñ lauT kar ghar ko aa rahā thā

    sitār ḳhāmosh ho chukā thā magar ye dil gungunā rahā thā

    zamāna guzrā nuqūsh-e-māzī ḳhayāl se miTte rahe haiñ

    magar vo naġhme 'jamīl' ab tak dimāġh ko gudgudā rahe haiñ

    nazar mein shaer ke phir raha hai, hara-bhara pur-bahaar jangal

    wo subh-e-rangin, wo kaif-e-manzar, wo daman-e-koh bindhiya-chal

    mili thi ek rang-o-bu ki duniya, tamam sahra chaman chaman tha

    magar wo jannat-nigah wadi bahaar ka mustaqil watan tha

    khaDa hua tha gharib shaer, KHamosh sahra-e-rang-o-bu mein

    machal rahi thi sahar ki doshiza shab ke aaghosh-e-arzu mein

    hon chashm-e-ashiq mein jaise aansu, sitare yun jhilmila rahe the

    falak pe barham thi bazm-e-anjum, charagh gul hote ja rahe the

    tajalliyon ki falak se barish thi, zulmat-e-shab bikhar rahi thi

    ki subh ki sanwli hasina naha rahi thi, nikhar rahi thi

    nadi mein halka sa tha tamawwuj kahen jise be-qarar ghaflat

    ki nind mein jaise karwaTen le, jawan, bad-mast-e-KHwab aurat

    hawa jo shana hila rahi thi, to maujen hushiyar ho rahi thin

    tuyur ke mast zamzamon se fazaen bedar ho rahi thin

    ye kaifiyat thi aur ek jogan sitar baiThi baja rahi thi

    magar wo jangal ki shahzadi bahaar ke git ga rahi thi

    bahaar ke git ga rahi thi faza mein naghme bikherti thi

    sukut fitrat ka dad deta tha ruKH jidhar ko wo pherti thi

    wo nind se muzmahil nigahen wo lab pe maghmum muskurahaT

    hazar andaz-e-dil-rubai aur ek masum muskurahaT

    thin nind se rasmasai aankhen aur in mein shoKHi machal rahi thi

    KHumar-aluda ankhDiyon mein bahaar ki ruh pal rahi thi

    qamar ki talat, shafaq ki surKHi, jabin pe subh-e-bahaar KHandan

    nigah aaina-dar-e-manzar, jamal parwarda-e-byaban

    sitar pe nazuk ungliyan thin, kalai gori lachak rahi thi

    umangen leti thin dil mein karwaT, rag-e-jawani phaDak rahi thi

    sunahre jalwon ki chhuT Dali jo shah-e-KHawar ke taj-e-zar ne

    talai afshan chuni jabin par malih doshiza-e-sahar ne

    talai zewar se aur chamki urus-e-manzar ki dilrubai

    uTha jo suraj to dhup nikli hasina-e-subh khilkilai

    faza ki tabdiliyon ko dekha jo bazm-e-fitrat ki mutriba ne

    sitar rakkha, uThai gagri, nadi kinare chali nahane

    wo ja rahi thi nadi ki jaanib main lauT kar ghar ko aa raha tha

    sitar KHamosh ho chuka tha magar ye dil gunguna raha tha

    zamana guzra nuqush-e-mazi KHayal se miTte ja rahe hain

    magar wo naghme 'jamil' ab tak dimagh ko gudguda rahe hain

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY