nun-mim-rashid ke intiqal par

ye raat hai ki harf-o-hunar kā ziyāñ-kada

iz.hār apne-āp meñ mohmal hue tamām

ab maiñ huuñ aur lamha-e-lahūt kā safīr

mahv-e-duā huā mire andar koī faqīr

siine pe kaisā bojh hai hotā nahīñ subuk

hoñToñ ke zāviyoñ meñ phañsā hai ''ḳhudā...ḳhudā''

kyā lafz hai ki jiibh se hotā nahīñ adā

kamzor haath haiñ ki nahīñ uThte sū-e-bām

iz.hār apne aap meñ zaa.il hue tamām

sirf aañkh hai ki dekhtī hai chāñd nisf gol

ai ḳhāmushī kī shāḳh pe baiThe parind... bol

ye raat hai ki harf-o-hunar ka ziyan-kada

izhaar apne-ap mein mohmal hue tamam

ab main hun aur lamha-e-lahut ka safir

mahw-e-dua hua mere andar koi faqir

sine pe kaisa bojh hai hota nahin subuk

honTon ke zawiyon mein phansa hai KHudaKHuda

kya lafz hai ki jibh se hota nahin ada

kamzor hath hain ki nahin uThte su-e-baam

izhaar apne aap mein zail hue tamam

sirf aankh hai ki dekhti hai chand nisf gol

ai KHamushi ki shaKH pe baiThe parind bol