nuzul-e-wahi

qadam chālīsvīñ manzil meñ us yūsuf ne jab rakkhā

to pahuñchā kārvān-e-vah.i āvāz-e-jaras ho kar

ki dil to jaag uThā āñkhoñ meñ ġhaflat niiñd kī chhā.ī

huā siine meñ is se maujzan ik lujja-e-irfāñ

ki taab is jazr-o-mad kī fitrat-e-insāñ nahīñ laa.ī

baḌhā josh is kā baḌh kar sāhil-e-aflāk tak pahuñchā

uThī mauj is se uTh kar arsh kī zanjīr khaḌkā.ī

jharokā arsh kā rūhul-qudus ne khol kar dekhā

to niklā muddatoñ kā rabt barsoñ kī shanāsā.ī

huiiñ jaarī zabāñ par āyateñ vo nuur kī jis par

fidā ho lahn-e-dā.ūdī-o-anfās-e-masīhā.ī

qadam chaaliswin manzil mein us yusuf ne jab rakkha

to pahuncha karwan-e-wahi aawaz-e-jaras ho kar

ki dil to jag uTha aankhon mein ghaflat nind ki chhai

hua sine mein is se maujzan ek lujja-e-irfan

ki tab is jazr-o-mad ki fitrat-e-insan nahin lai

baDha josh is ka baDh kar sahil-e-aflak tak pahuncha

uThi mauj is se uTh kar arsh ki zanjir khaDkai

jharoka arsh ka ruhul-qudus ne khol kar dekha

to nikla muddaton ka rabt barson ki shanasai

huin jari zaban par aayaten wo nur ki jis par

fida ho lahn-e-daudi-o-anfas-e-masihai