pagal laDki

apnī mohabbat ke haañ karne

chhup ke nikāh ke do boloñ par ḳhush hone aur

us hī ḳhushī meñ apne hāthoñ ko mehñdī se rañgne vaalī

har-pal shoḳhī se muskātī pāgal laḌkī

is mehñdī kā rañg phīkā paḌne se pahle

tere sayyāñ

chhoḌ ke baiyyāñ

apnī ek na.ī duniyā meñ magan hue haiñ

ik do din meñ tujh se jo kuchh lenā hai vo sab kuchh le kar

aur talāq kī kālak tere muñh par mal kar

mahr ke naam par ehsāñ kar ke

tujh ko aisā zer kareñge ki sab shoḳhī

āñkhoñ meñ maujūd ye mastī

terī hastī

sab kuchh bas ik pal meñ ulTā ho jā.egā

terī qismat ke dukh jitne sanjīda haiñ

pāgal laḌkī

tū bhī yak-dam vaisī hī sanjīda hogī

apni mohabbat ke han karne

chhup ke nikah ke do bolon par KHush hone aur

us hi KHushi mein apne hathon ko mehndi se rangne wali

har-pal shoKHi se muskati pagal laDki

is mehndi ka rang phika paDne se pahle

tere sayyan

chhoD ke baiyyan

apni ek nai duniya mein magan hue hain

ek do din mein tujh se jo kuchh lena hai wo sab kuchh le kar

aur talaq ki kalak tere munh par mal kar

mahr ke nam par ehsan kar ke

tujh ko aisa zer karenge ki sab shoKHi

aankhon mein maujud ye masti

teri hasti

sab kuchh bas ek pal mein ulTa ho jaega

teri qismat ke dukh jitne sanjida hain

pagal laDki

tu bhi yak-dam waisi hi sanjida hogi