patal zamin aasman

kahānī ke saare parinde

bahut duur shāyad ufuq meñ

kahīñ munjamid ho ga.e haiñ

shajar zard pattoñ kī tasvīr ban kar

alāmat kī tahrīr ban kar

bikharne lagā hai

kisī jhiil ke ā.īne meñ vo mah-vash

badan ke kisī zāviye se nikalne kī ḳhvāhish meñ

palkeñ uThā.e hue dekhtī rah ga.ī hai

parindoñ kī mānind maiñ bhī yahāñ thā

magar ab nahīñ huuñ

ki hone kī ḳhvāhish ne shāyad mujhe bhī

ḳhalā meñ muallaq sitāroñ kī mānind gum kar diyā hai

na ab mausamoñ ke sitam haiñ

na ab raat kī sard āmezishoñ meñ ThiThurne kī rāhat hī āvāz dete haiñ mujh ko

na patthar kī mānind hāthoñ meñ sūraj

rag-o-pai meñ mere lahū kī harārat banegā

zamāna koī shobada-gar

mujhe duur hī duur le jā rahā hai

ki maiñ nīm-vā ġhaar kī sīḌhiyoñ meñ utarne lagā huuñ

charāġh-e-tilismāt milne se pahle

zamīn ne mujhe apnī āġhosh meñ le liyā hai

duā bad-duā ban ga.ī hai

ki har lafz ke dā.ere se lahū ris rahā hai

kisī sānehe ne zamīñ se falak kī taraf jaate jaate

mujhe bhī sitāroñ meñ gum kar diyā hai

ki maiñ apne saa.e kī dahlīz par

lazzat-e-āshnā.ī meñ khoyā huā ajnabī huuñ

kahani ke sare parinde

bahut dur shayad ufuq mein

kahin munjamid ho gae hain

shajar zard patton ki taswir ban kar

alamat ki tahrir ban kar

bikharne laga hai

kisi jhil ke aaine mein wo mah-wash

badan ke kisi zawiye se nikalne ki KHwahish mein

palken uThae hue dekhti rah gai hai

parindon ki manind main bhi yahan tha

magar ab nahin hun

ki hone ki KHwahish ne shayad mujhe bhi

KHala mein muallaq sitaron ki manind gum kar diya hai

na ab mausamon ke sitam hain

na ab raat ki sard aamezishon mein ThiThurne ki rahat hi aawaz dete hain mujh ko

na patthar ki manind hathon mein suraj

rag-o-pai mein mere lahu ki hararat banega

zamana koi shobada-gar

mujhe dur hi dur le ja raha hai

ki main nim-wa ghaar ki siDhiyon mein utarne laga hun

charagh-e-tilismat milne se pahle

zamin ne mujhe apni aaghosh mein le liya hai

dua bad-dua ban gai hai

ki har lafz ke daere se lahu ris raha hai

kisi sanehe ne zamin se falak ki taraf jate jate

mujhe bhi sitaron mein gum kar diya hai

ki main apne sae ki dahliz par

lazzat-e-ashnai mein khoya hua ajnabi hun