pahli kiran

koī mujh ko daur-e-zamān-o-makāñ se nikalne kī sūrat batā do

koī ye sujhā do ki hāsil hai kyā hastī-e-rā.egāñ se

ki ġhairoñ kī tahzīb kī ustuvārī kī ḳhātir

abas ban rahā hai hamārā lahū momyā.ī

maiñ us qaum kā fard huuñ jis ke hisse meñ mehnat hī mehnat hai nān-e-shabīna nahīñ hai

aur is par bhī ye qaum dil shaad hai shaukat-e-bāstāñ se

aur ab bhī hai ummīd-e-fardā kisī sāhir-e-be-nishāñ se

mirī jaañ shab-o-roz kī is mashaqqat se tañg aa gayā huuñ

maiñ is ḳhisht-kobī se uktā gayā huuñ

kahāñ haiñ vo duniyā kī taz.īn kī ārzūeñ

jinhoñ ne tujhe mujh se vābasta-tar kar diyā thā

tirī chhātiyoñ kī jū-e-shīr kyuuñ zahr kā ik samundar na ban jaa.e

jise pī ke so jaa.e nannhī sī jaañ

jo ik chhipkilī ban ke chimTī huī hai tere sīna-e-meharbāñ se

jo vāqif nahīñ tere dard-e-nihāñ se

ise bhī to zillat kī pābandagī ke liye āla-e-kār banñā paḌegā

bahut hai ki ham apne aabā kī āsūda-koshī kī pādāsh meñ

aaj be-dast-o-pā haiñ

is ā.inda nasloñ kī zanjīr-e-pā ko to ham toḌ Dāleñ

magar ai mirī tiira rātoñ kī sāthī

ye shahnā.iyāñ sun rahī ho

ye shāyad kisī ne masarrat kī pahlī kiran dekh paa.ī

nahīñ is darīche ke bāhar to jhāñko

ḳhudā kā janāza liye jā rahe haiñ farishte

usī sāhir-e-be-nishāñ kā

jo maġhrib kā aaqā thā mashriq kā aaqā nahīñ thā

ye insān kī bartarī ke na.e daur ke shādyāne haiñ sun lo

yahī hai na.e daur kā partav-e-avvalīñ bhī

uTho aur ham bhī zamāne kī taaza vilādat ke is jashn meñ

mil ke dhūmeñ machā.eñ

shuāoñ ke tūfān meñ be-mahābā nahā.eñ

koi mujh ko daur-e-zaman-o-makan se nikalne ki surat bata do

koi ye sujha do ki hasil hai kya hasti-e-raegan se

ki ghairon ki tahzib ki ustuwari ki KHatir

abas ban raha hai hamara lahu momyai

main us qaum ka fard hun jis ke hisse mein mehnat hi mehnat hai nan-e-shabina nahin hai

aur is par bhi ye qaum dil shad hai shaukat-e-bastan se

aur ab bhi hai ummid-e-farda kisi sahir-e-be-nishan se

meri jaan shab-o-roz ki is mashaqqat se tang aa gaya hun

main is KHisht-kobi se ukta gaya hun

kahan hain wo duniya ki tazin ki aarzuen

jinhon ne tujhe mujh se wabasta-tar kar diya tha

teri chhatiyon ki ju-e-shir kyun zahr ka ek samundar na ban jae

jise pi ke so jae nannhi si jaan

jo ek chhipkili ban ke chimTi hui hai tere sina-e-meharban se

jo waqif nahin tere dard-e-nihan se

ise bhi to zillat ki pabandagi ke liye aala-e-kar banna paDega

bahut hai ki hum apne aaba ki aasuda-koshi ki padash mein

aaj be-dast-o-pa hain

is aainda naslon ki zanjir-e-pa ko to hum toD Dalen

magar ai meri tera raaton ki sathi

ye shahnaiyan sun rahi ho

ye shayad kisi ne masarrat ki pahli kiran dekh pai

nahin is dariche ke bahar to jhanko

KHuda ka janaza liye ja rahe hain farishte

usi sahir-e-be-nishan ka

jo maghrib ka aaqa tha mashriq ka aaqa nahin tha

ye insan ki bartari ke nae daur ke shadyane hain sun lo

yahi hai nae daur ka partaw-e-awwalin bhi

uTho aur hum bhi zamane ki taza wiladat ke is jashn mein

mil ke dhumen machaen

shuaon ke tufan mein be-mahaba nahaen