paiman-e-wafa

raushnī kī ek halkī sī kiran

zulm ke gahre añdheroñ se uThī

duur jā kar jagmagātī barf ke

koh-e-pur-anvār meñ gum ho ga.ī

phuul niilā āsmāñ ruḳhsār-o-lab

us kiran kī raah meñ yuuñ aa ga.e

ham ki jo naqd-e-dil-o-jāñ le ke saath

dard kī rāhoñ pe the mahv-e-safar

apne hī ādarsh se sharmā ga.e

hañs rahā hai vaqt kā zaḳhmī kañval

zindagī kī is sunahrī maat par

ahl-e-dil phir bhī ravāñ haiñ sū-e-dār

tohfa-e-jāñ le ke apne haat par

ham ne chāhā thā use har bazm meñ

ab bhī chāheñge use har moḌ par

qatl-gāh-e-zindagī meñ har ghaḌī

ab bhī DhūñDegī use apnī nazar

raushni ki ek halki si kiran

zulm ke gahre andheron se uThi

dur ja kar jagmagati barf ke

koh-e-pur-anwar mein gum ho gai

phul nila aasman ruKHsar-o-lab

us kiran ki rah mein yun aa gae

hum ki jo naqd-e-dil-o-jaan le ke sath

dard ki rahon pe the mahw-e-safar

apne hi aadarsh se sharma gae

hans raha hai waqt ka zaKHmi kanwal

zindagi ki is sunahri mat par

ahl-e-dil phir bhi rawan hain su-e-dar

tohfa-e-jaan le ke apne hat par

hum ne chaha tha use har bazm mein

ab bhi chahenge use har moD par

qatl-gah-e-zindagi mein har ghaDi

ab bhi DhunDegi use apni nazar