panah

guzishta bārishoñ kī be-charāġh rātoñ meñ

jab kahāniyāñ bunte hue merī aañkh lag jaatī

to kuttoñ aur bheḌiyoñ kā bhauñktā ġhurrātā ġhol

mere ḳhvāboñ par TuuT paḌtā

merī car ke gird

aur mere makān ke chaar sū

apne apne bāñTe hue ilāqoñ se nikal kar

mujh par hamla karne kī ḳhātir

azalī dushmanoñ kā Tolā

ek ho kar

merī bū sūñghtā phirtā

lekin taaza bārishoñ ne

ḳhvāb aur haqīqat kā farq miTā diyā hai

lihāzā

ab vo maikānikī vaqt ke pāband nahīñ rahe

aur psychological vaqt ke mutābiq mujhe khojte haiñ

ek pahar meñ chhiyānve baar

bhūñkte ġhurrāte aur raal Tapkāte hue

magar maiñ unheñ kahīñ nahīñ miltī

na ghar meñ na galī meñ na car meñ

kyoñ ki ab maiñ ek nazm kī panāh meñ huuñ

jis kī bū sūñghnā

un ke bas se bāhar hai

guzishta barishon ki be-charagh raaton mein

jab kahaniyan bunte hue meri aankh lag jati

to kutton aur bheDiyon ka bhaunkta ghurraata ghol

mere KHwabon par TuT paDta

meri car ke gird

aur mere makan ke chaar su

apne apne banTe hue ilaqon se nikal kar

mujh par hamla karne ki KHatir

azali dushmanon ka Tola

ek ho kar

meri bu sunghta phirta

lekin taza barishon ne

KHwab aur haqiqat ka farq miTa diya hai

lihaza

ab wo maikaniki waqt ke paband nahin rahe

aur psychological waqt ke mutabiq mujhe khojte hain

ek pahar mein chhiyanwe bar

bhunkte ghurraate aur ral Tapkate hue

magar main unhen kahin nahin milti

na ghar mein na gali mein na car mein

kyon ki ab main ek nazm ki panah mein hun

jis ki bu sunghna

un ke bas se bahar hai