pandrah-august

yahī vo din hai āzādī kī jab pahlī bahār aa.ī

chaman meñ nāchtī gaatī nasīm-e-lāla-kār aa.ī

har ik Tahnī pe phūloñ kī qatār-andar-qatār aa.ī

ghaTā ke ruup meñ ḳhud rahmat-e-parvardigār aa.ī

shab-e-tārīk ke parde se bāhar āftāb aayā

har ik zarra pukār uTThā jahāñ meñ inqalāb aayā

yahī vo din hai jab naḳhl-e-tamannā meñ samar aayā

ġharīboñ bekasoñ ke āh-o-nāla meñ asar aayā

ġhulāmī kī shab-e-yaldā ko paiġhām-e-sahar aayā

qafas ik ḳhūbsūrat āshiyāna phir nazar aayā

par-e-parvāz murġh-e-shouq-e-dil ko mil ga.e phir se

tamannāoñ ke pazhmurda shagūfe khil ga.e phir se

dil-e-pur-ārzū ko shān-e-mustaqbil kā ḳhvāb aayā

har ik zarre kī ḳhalvat-gāh meñ ḳhud āftāb aayā

sitāroñ ke hasīñ jhurmuT meñ hañstā māhtāb aayā

zamīñ uḌ kar falak par aa ga.ī vo inqalāb aayā

nazar aane lage chāroñ-taraf sāmān-e-rā’nā.ī

rag-o-pai meñ surūr aayā nazar meñ raushnī aa.ī

na.ī duniyā na.e sāmāñ na.ī mahfil nazar aa.ī

na.e rahrav na.e jaade na.ī manzil nazar aa.ī

na.ī uljhan na.e 'uqde na.ī mushkil nazar aa.ī

ġharaz turfa-tamāshā bazm-e-āb-o-gil nazar aa.ī

udhar ummīd ke raushan sitāre kuchh nazar aa.e

idhar shak ke ghane saa.e dil-o-jāñ meñ utar aa.e

yahī din hai hue jab mulk-e-ḳhasta-hāl ke TukḌe

hue punjab ke TukḌe hue bangāl ke TukḌe

uḌe tahzīb-e-ādam ke sunahre jaal ke TukḌe

gire kaT kar kahīñ maañ ke kahīñ atfāl ke TukḌe

yahī vo din hai jab aġhyār kī ummīd bar aa.ī

sahar aa.ī vatan meñ zulmateñ le kar magar aa.ī

yahī vo din hai jis ke saath saath aa.ī qayāmat bhī

diloñ meñ jaag uThī nafrat bhī derīna 'adāvat bhī

na kaam aa.ī hazāroñ saal kī aapas meñ ulfat bhī

vo hashr uTThā ki ab tak ro rahī hai ādmiyyat bhī

jo aivānoñ meñ rahte the vo be-ghar ho ga.e saare

jo apne vaqt ke qārūñ the be-zar ho ga.e saare

yahī vo din hai jo āb-e-baqā teġh-e-do-dam bhī hai

yahī vo din hai jo abr-e-karam barq-e-sitam bhī hai

yahī vo din hai jo dozaḳh bhī hai bāġh-e-iram bhī hai

kuchh ehsās-e-ḳhushī dil meñ hai kuchh ehsās-e-ġham bhī hai

na pūchho ham se kyūñkar zindagī ke din guzarte haiñ

ye hālat ho ga.ī hai ab na jiite haiñ na marte haiñ

yahi wo din hai aazadi ki jab pahli bahaar aai

chaman mein nachti gati nasim-e-lala-kar aai

har ek Tahni pe phulon ki qatar-andar-qatar aai

ghaTa ke rup mein KHud rahmat-e-parwardigar aai

shab-e-tarik ke parde se bahar aaftab aaya

har ek zarra pukar uTTha jahan mein inqalab aaya

yahi wo din hai jab naKHl-e-tamanna mein samar aaya

gharibon bekason ke aah-o-nala mein asar aaya

ghulami ki shab-e-yalda ko paigham-e-sahar aaya

qafas ek KHubsurat aashiyana phir nazar aaya

par-e-parwaz murgh-e-shouq-e-dil ko mil gae phir se

tamannaon ke pazhmurda shagufe khil gae phir se

dil-e-pur-arzu ko shan-e-mustaqbil ka KHwab aaya

har ek zarre ki KHalwat-gah mein KHud aaftab aaya

sitaron ke hasin jhurmuT mein hansta mahtab aaya

zamin uD kar falak par aa gai wo inqalab aaya

nazar aane lage chaaron-taraf saman-e-ra’nai

rag-o-pai mein surur aaya nazar mein raushni aai

nai duniya nae saman nai mahfil nazar aai

nae rahraw nae jade nai manzil nazar aai

nai uljhan nae 'uqde nai mushkil nazar aai

gharaz turfa-tamasha bazm-e-ab-o-gil nazar aai

udhar ummid ke raushan sitare kuchh nazar aae

idhar shak ke ghane sae dil-o-jaan mein utar aae

yahi din hai hue jab mulk-e-KHasta-haal ke TukDe

hue punjab ke TukDe hue bangal ke TukDe

uDe tahzib-e-adam ke sunahre jal ke TukDe

gire kaT kar kahin man ke kahin atfal ke TukDe

yahi wo din hai jab aghyar ki ummid bar aai

sahar aai watan mein zulmaten le kar magar aai

yahi wo din hai jis ke sath sath aai qayamat bhi

dilon mein jag uThi nafrat bhi derina 'adawat bhi

na kaam aai hazaron sal ki aapas mein ulfat bhi

wo hashr uTTha ki ab tak ro rahi hai aadmiyyat bhi

jo aiwanon mein rahte the wo be-ghar ho gae sare

jo apne waqt ke qarun the be-zar ho gae sare

yahi wo din hai jo aab-e-baqa tegh-e-do-dam bhi hai

yahi wo din hai jo abr-e-karam barq-e-sitam bhi hai

yahi wo din hai jo dozaKH bhi hai bagh-e-iram bhi hai

kuchh ehsas-e-KHushi dil mein hai kuchh ehsas-e-gham bhi hai

na puchho hum se kyunkar zindagi ke din guzarte hain

ye haalat ho gai hai ab na jite hain na marte hain