parda-e-zangari

dekh in reshmī pardoñ kī hadoñ se bāhar

dekh lohe kī salāḳhoñ se pare

dekh saḌkoñ pe ye āvāra-mizājoñ kā hujūm

dekh tahzīb ke māroñ kā hujūm

apnī āñkhoñ meñ chhupā.e hue armān kī laash

qāfile aate chale jaate haiñ

zindagī ek hī mahvar kā sahārā le kar

nāchte nāchte thak jaatī hai

nāchte nāchte thak jaatī hai

tere pur-nūr shabistāñ meñ koī mast shabāb

jis kī pāzeb kī har lai meñ hazāroñ lāsheñ

chāndnī raat meñ biite hue rūmānoñ kī

apnī har saañs se bāñdhe hue paimānoñ kī

chīḳhtī chīḳhtī so jaatī haiñ

ye kashākash ye tasādum ye tazād

maan letā huuñ ye fitrat kī fusūñ-kārī hai

in usūloñ hī pe qaa.em hai tamaddun kā nizām

tū ye kahtā hai to maiñ bhī tirī ḳhātir ai dost

maan letā huuñ ye insān kī taḳhlīq nahīñ

koī māshūq hai us parda-e-zañgārī meñ

terā māshūq mire ahd kā insāñ to nahīñ

terī tamhīd mirī nazm kā unvāñ to nahīñ

dekh in reshmi pardon ki hadon se bahar

dekh lohe ki salaKHon se pare

dekh saDkon pe ye aawara-mizajon ka hujum

dekh tahzib ke maron ka hujum

apni aankhon mein chhupae hue arman ki lash

qafile aate chale jate hain

zindagi ek hi mahwar ka sahaara le kar

nachte nachte thak jati hai

nachte nachte thak jati hai

tere pur-nur shabistan mein koi mast shabab

jis ki pazeb ki har lai mein hazaron lashen

chandni raat mein bite hue rumanon ki

apni har sans se bandhe hue paimanon ki

chiKHti chiKHti so jati hain

ye kashakash ye tasadum ye tazad

man leta hun ye fitrat ki fusun-kari hai

in usulon hi pe qaem hai tamaddun ka nizam

tu ye kahta hai to main bhi teri KHatir ai dost

man leta hun ye insan ki taKHliq nahin

koi mashuq hai us parda-e-zangari mein

tera mashuq mere ahd ka insan to nahin

teri tamhid meri nazm ka unwan to nahin