pathar

tire nikhre hue jalvoñ ne dī thī raushnī mujh ko

tire rañgīñ ishāroñ ne mujhe jiinā sikhāyā thā

qasam khaa.ī thī tū ne zindagī bhar saath dene kī

baḌe hī naaz se tū ne mujhe apnā banāyā thā

magar pachhtā rahā huuñ ab tirī be-e'tinā.ī par

ki maiñ ne kyuuñ mohabbat kā sunahrā zaḳhm khāyā thā

tirā paikar tirī bāñheñ tirī āñkheñ tirī palkeñ

tire aariz tirī zulfeñ tire shāne kisī ke haiñ

mirā kuchh bhī nahīñ is zindagī ke bāda-ḳhāne meñ

ye ḳhum ye jaam ye shīshe ye paimāne kisī ke haiñ

banāyā thā jinheñ rañgīn apne ḳhuun se maiñ ne

vo afsāne nahīñ mere vo afsāne kisī ke haiñ

kisī ne sone chāñdī se tire dil ko ḳharīdā hai

kisī ne tere dil kī dhaḌkanoñ ke giit gaa.e haiñ

kisī zālim ne luuTā hai tire jalvoñ kī jannat ko

magar maiñ ne tirī yādoñ se vīrāne sajā.e haiñ

kabhī jin par mohabbat kā muqaddar naaz kartā thā

vo yādeñ bhī nahīñ apnī vo sapne bhī parā.e haiñ

kise ma.alūm thā manzil hī mujh se ruuTh jā.egī

laraz kar TuuT jā.eñge mirī qismat ke sayyāre

sar-e-bāzār bik jā.egī tere pyaar kī azmat

chaleñge ishq ke hassās dil par zulm ke aare

baḌe armān se maiñ ne chunā thā jin ko dāman meñ

kise ma.alūm thā vo phuul ban jā.eñge añgāre

jahāñ tū hai vahāñ haiñ nuqra.ī sāzoñ kī jhankāreñ

jahāñ maiñ huuñ vahāñ chīḳheñ haiñ fariyādeñ haiñ naale haiñ

mirī duniyā meñ ġham hī ġham haiñ tārīkī hī tārīkī

tirī duniyā meñ naġhme haiñ bahāreñ haiñ ujāle haiñ

mirī jholī meñ kañkar haiñ tirī āġhosh meñ hiire

tire pairoñ meñ paa.el hai mire pairoñ meñ chhāle haiñ

maiñ jab bhī ġhaur kartā huuñ tirī is bevafā.ī par

to ġham kī aag meñ mehr-o-vafā ke phuul jalte haiñ

na fariyādoñ se zanjīroñ kī kaḌiyāñ TuuT saktī haiñ

na ashkoñ se nizām-e-vaqt ke tevar badalte haiñ

maiñ bhar saktā huuñ terī yaad meñ hasrat bharī aa.heñ

magar aahoñ kī garmī se kahīñ patthar pighalte haiñ

tere nikhre hue jalwon ne di thi raushni mujh ko

tere rangin ishaaron ne mujhe jina sikhaya tha

qasam khai thi tu ne zindagi bhar sath dene ki

baDe hi naz se tu ne mujhe apna banaya tha

magar pachhta raha hun ab teri be-e'tinai par

ki main ne kyun mohabbat ka sunahra zaKHm khaya tha

tera paikar teri banhen teri aankhen teri palken

tere aariz teri zulfen tere shane kisi ke hain

mera kuchh bhi nahin is zindagi ke baada-KHane mein

ye KHum ye jam ye shishe ye paimane kisi ke hain

banaya tha jinhen rangin apne KHun se main ne

wo afsane nahin mere wo afsane kisi ke hain

kisi ne sone chandi se tere dil ko KHarida hai

kisi ne tere dil ki dhaDkanon ke git gae hain

kisi zalim ne luTa hai tere jalwon ki jannat ko

magar main ne teri yaadon se virane sajae hain

kabhi jin par mohabbat ka muqaddar naz karta tha

wo yaaden bhi nahin apni wo sapne bhi parae hain

kise malum tha manzil hi mujh se ruTh jaegi

laraz kar TuT jaenge meri qismat ke sayyare

sar-e-bazar bik jaegi tere pyar ki azmat

chalenge ishq ke hassas dil par zulm ke aare

baDe arman se main ne chuna tha jin ko daman mein

kise malum tha wo phul ban jaenge angare

jahan tu hai wahan hain nuqrai sazon ki jhankaren

jahan main hun wahan chiKHen hain fariyaaden hain nale hain

meri duniya mein gham hi gham hain tariki hi tariki

teri duniya mein naghme hain bahaaren hain ujale hain

meri jholi mein kankar hain teri aaghosh mein hire

tere pairon mein pael hai mere pairon mein chhaale hain

main jab bhi ghaur karta hun teri is bewafai par

to gham ki aag mein mehr-o-wafa ke phul jalte hain

na fariyaadon se zanjiron ki kaDiyan TuT sakti hain

na ashkon se nizam-e-waqt ke tewar badalte hain

main bhar sakta hun teri yaad mein hasrat bhari aahen

magar aahon ki garmi se kahin patthar pighalte hain