patthar ka dil

mohabbat ko badduā na do

jashn-e-judā.ī dil-e-nā-subūr kī tajdīd hai

bichhaḌ jaanā hādisa hai

shab-e-dil-barī tumheñ kho dene ka sog hai

jahāñ taqdīr kī tasvīreñ miTā dī jaatī haiñ

mohabbat kā inkishāf kahānī ban kar

hameñ barbād kar detā hai

bebasī hameñ judā kar detī hai

mohabbat diloñ ke uqūbat-ḳhāne meñ mahfūz rahtī hai

jab koī mohabbat meñ siskā siskā kar maar diyā jaatā hai

judā.ī ka sadma vahī jāntā hai

jis ke ḳhvāboñ se gulāb chhīn liye jaate haiñ

ḳhudā tumheñ merī yaad meñ na tarsā.e

tum merī sochoñ meñ ābād raho

sānahe aate haiñ aur jaate haiñ

judā.ī kī ḳhatm hone vaalī zindagī

mohabbat na ḳhatm hone vaalā safar hai

azal se abad tak ḳhvāboñ se haqīqat tak

dil se ruuh tak

dil samjhauta nahīñ kartā

ḳhvāb bāġhī hote haiñ

jaise hamārā sadiyoñ kā marā huā lamhoñ ka pyaar

tanhā.iyoñ meñ rāste kahīñ kho jaate haiñ

ḳhvāboñ kī sunsān galiyoñ meñ

hāthoñ meñ liye phirtā huuñ

aag meñ bujhā huā patthar kā dil

mohabbat ko baddua na do

jashn-e-judai dil-e-na-subur ki tajdid hai

bichhaD jaana hadisa hai

shab-e-dil-bari tumhein kho dene ka sog hai

jahan taqdir ki taswiren miTa di jati hain

mohabbat ka inkishaf kahani ban kar

hamein barbaad kar deta hai

bebasi hamein juda kar deti hai

mohabbat dilon ke uqubat-KHane mein mahfuz rahti hai

jab koi mohabbat mein siska siska kar mar diya jata hai

judai ka sadma wahi jaanta hai

jis ke KHwabon se gulab chhin liye jate hain

KHuda tumhein meri yaad mein na tarsae

tum meri sochon mein aabaad raho

sanahe aate hain aur jate hain

judai ki KHatm hone wali zindagi

mohabbat na KHatm hone wala safar hai

azal se abad tak KHwabon se haqiqat tak

dil se ruh tak

dil samjhauta nahin karta

KHwab baghi hote hain

jaise hamara sadiyon ka mara hua lamhon ka pyar

tanhaiyon mein raste kahin kho jate hain

KHwabon ki sunsan galiyon mein

hathon mein liye phirta hun

aag mein bujha hua patthar ka dil