pesh-rau pesh-e-nazar

azm se bantā hai mustaqbil-e-aqvām-e-jahāñ

azm-e-insāñ ko samajh aaj kī hālat ko na dekh

abtarī sat.h kī uljhī huī maujoñ kā hai naam

asl shai ruuh hai bigḌī huī sūrat ko na dekh

saaz bajte haiñ mohabbat ke darūn-e-mahfil

tū dar-e-yār ke darbāñ kī shaqāvat ko na dekh

kār-e-taḳhlīq-e-bahārāñ meñ haiñ sho.ale filhāl

sāvan aatā hai bas ab jeTh kī hiddat ko na dekh

aaj kā ḳhuun hai rang-e-gul-e-fardā ke liye

dard-e-zaḳhm-e-dil-e-majrūh kī shiddat ko na dekh

ashk motī sadaf-e-vaqt meñ ban jā.eñge

ho ke māyūs gulū-gīrī-e-riqqat ko na dekh

pesh-rau pesh-e-nazar haiñ yahī ādāb-e-hayāt

sub.h hone ko hai ab raat kī zulmat ko na dekh

azm se banta hai mustaqbil-e-aqwam-e-jahan

azm-e-insan ko samajh aaj ki haalat ko na dekh

abtari sath ki uljhi hui maujon ka hai nam

asl shai ruh hai bigDi hui surat ko na dekh

saz bajte hain mohabbat ke darun-e-mahfil

tu dar-e-yar ke darban ki shaqawat ko na dekh

kar-e-taKHliq-e-bahaaran mein hain shoale filhaal

sawan aata hai bas ab jeTh ki hiddat ko na dekh

aaj ka KHun hai rang-e-gul-e-farda ke liye

dard-e-zaKHm-e-dil-e-majruh ki shiddat ko na dekh

ashk moti sadaf-e-waqt mein ban jaenge

ho ke mayus gulu-giri-e-riqqat ko na dekh

pesh-rau pesh-e-nazar hain yahi aadab-e-hayat

subh hone ko hai ab raat ki zulmat ko na dekh