phulon ki ghazal

ḳhushnumā hai hayāt phūloñ kī

dekhnā kā.enāt phūloñ kī

juuhī champā chamelī aur gulāb

naam bachchoñ ke zaat phūloñ kī

titliyoñ kī tarah sajal nāzuk

un kī har baat baat phūloñ kī

ye nahīñ jānte ki ġham kyā hai

din hai phūloñ kā raat phūloñ kī

vo jo paḌhte haiñ aur likhte haiñ

aur karte haiñ baat phūloñ kī

lahlahātā chaman hujūm-e-bahār

muskurātī hai zaat phūloñ kī

ilm kī raushnī ke diip jaleñ

mahkī mahkī hai raat phūloñ kī

nazr-e-‘maḳhdūm’ hai ġhazal bachcho

shaḳhsiyat thī hayāt phūloñ kī

phuul kī tarah madrasoñ meñ 'vaqār'

saj rahī hai barāt phūloñ kī

KHushnuma hai hayat phulon ki

dekhna kaenat phulon ki

juhi champa chameli aur gulab

nam bachchon ke zat phulon ki

titliyon ki tarah sajal nazuk

un ki har baat baat phulon ki

ye nahin jaante ki gham kya hai

din hai phulon ka raat phulon ki

wo jo paDhte hain aur likhte hain

aur karte hain baat phulon ki

lahlahata chaman hujum-e-bahaar

muskuraati hai zat phulon ki

ilm ki raushni ke dip jalen

mahki mahki hai raat phulon ki

nazr-e-‘maKHdum’ hai ghazal bachcho

shaKHsiyat thi hayat phulon ki

phul ki tarah madrason mein 'waqar'

saj rahi hai baraat phulon ki