pichhle bis barson mein

apne apne kāmoñ se

vaqt jo bhī bachtā thā

saath ham batāte the

jo samay guzarte the

un kī jag kahānī bhī

ek dūsre ko ham

shauq se sunāte the

lauT kar maiñ office se

jis ghaḌī thakā-hārā

apne ghar meñ aatā thā

sab takān din-bhar kī

apne dar kī chaukhaT se

duur chhoḌ aatā thā

yaad hai mujhe ab tak

din vo talḳh maazī kā

boss apne ghar se jab

piT-piTā ke aa.e the

taaza taaza chehre par

har taraf kharoñche thiiñ

kaT-khanī sī billī ne

shāyad apne panjoñ se

donoñ gaal noche the

naukrī to karnā thī

chākarī bhī karnā thī

so janāb-e-vālā ne

roz kī tarah pahle

haal boss kā apne

phone par hī pūchhā thā

aur phir receiver se

phone ke cradle ko

bebasī se piiTā thā

āñ-janāb ne us din

jis qadar bhī ġhussa thā

mujh pe hī utārā thā

merā jaisā bad-qismat

jab bhī sāmne aayā

DaañT kar bhagāyā thā

maiñ bhī kam na thā un se

apnī desk par jā kar

filoñ ko de paTḳhā

aur apne jaisoñ par

be-qusūr hī barsā

ye kathā mirī biivī

sun ke khilkhilā uThī

aur apnī din biitī

ḳhud hī phir shurūa kar dī

aaj merī maasī ne

phir gilās shīshe kā

chaknā-chūr kar Daalā

sirf ye nahīñ balki

kapḌe dhone vaalī ne

silk kā vo dupaTTa

kal hī jo ḳharīdā thā

bor bor kar Daalā

maiñ ne bhī lagī-lipTī

kuchh bachā nahīñ rakkhī

jis qadar thiiñ salvāteñ

be-nuqat sunā Dālīñ

apnī apnī din-bītī

donoñ jab bhī kah chukte

qahqahe lagāte the

yuuñ ham apnī ġhurbat kī

ḳhud hañsī uḌāte the

vo sukūñ jo ġhurbat ke

un dinoñ meñ hāsil thā

vo sukūñ nahīñ miltā

vo jo ghar kabhī jis meñ

dil hamārā lagtā thā

us meñ dil nahīñ lagtā

roz-o-shab kī gardish ne

sab hī kuchh badal Daalā

aur jo nahīñ badlā

pichhle biis barsoñ meñ

ik vahī mirā office

log ab bhī taqrīban

saath meñ vahī sab haiñ

farq hai to bas itnā

boss kī maiñ kursī par

boss ban ke baiThā huuñ

mere apne chehre par

har taraf kharoñche haiñ

saaf aisā lagtā hai

kaT-khanī sī billī ne

jaise gaal noche haiñ

apne apne kaamon se

waqt jo bhi bachta tha

sath hum batate the

jo samay guzarte the

un ki jag kahani bhi

ek dusre ko hum

shauq se sunate the

lauT kar main office se

jis ghaDi thaka-haara

apne ghar mein aata tha

sab takan din-bhar ki

apne dar ki chaukhaT se

dur chhoD aata tha

yaad hai mujhe ab tak

din wo talKH mazi ka

boss apne ghar se jab

piT-piTa ke aae the

taza taza chehre par

har taraf kharonche thin

kaT-khani si billi ne

shayad apne panjon se

donon gal noche the

naukri to karna thi

chaakari bhi karna thi

so janab-e-wala ne

roz ki tarah pahle

haal boss ka apne

phone par hi puchha tha

aur phir receiwer se

phone ke cradle ko

bebasi se piTa tha

aan-janab ne us din

jis qadar bhi ghussa tha

mujh pe hi utara tha

mera jaisa bad-qismat

jab bhi samne aaya

DanT kar bhagaya tha

main bhi kam na tha un se

apni desk par ja kar

filon ko de paTKHa

aur apne jaison par

be-qusur hi barsa

ye katha meri biwi

sun ke khilkhila uThi

aur apni din biti

KHud hi phir shurua kar di

aaj meri masi ne

phir gilas shishe ka

chakna-chur kar Dala

sirf ye nahin balki

kapDe dhone wali ne

silk ka wo dupaTTa

kal hi jo KHarida tha

bor bor kar Dala

main ne bhi lagi-lipTi

kuchh bacha nahin rakkhi

jis qadar thin salwaten

be-nuqat suna Dalin

apni apni din-biti

donon jab bhi kah chukte

qahqahe lagate the

yun hum apni ghurbat ki

KHud hansi uDate the

wo sukun jo ghurbat ke

un dinon mein hasil tha

wo sukun nahin milta

wo jo ghar kabhi jis mein

dil hamara lagta tha

us mein dil nahin lagta

roz-o-shab ki gardish ne

sab hi kuchh badal Dala

aur jo nahin badla

pichhle bis barson mein

ek wahi mera office

log ab bhi taqriban

sath mein wahi sab hain

farq hai to bas itna

boss ki main kursi par

boss ban ke baiTha hun

mere apne chehre par

har taraf kharonche hain

saf aisa lagta hai

kaT-khani si billi ne

jaise gal noche hain