pital ka sanp

aur pītal kā ye zahrīlā saañp

jis kī nāzuk sī zabāñ par ye ḳhunuk sham.a kī lau

lahr kī tarah añdhere meñ uThā kartī hai

mere ik dost ne tohfe meñ mujhe bhejā hai

haiñ ye tagore ke be-rabt taḳhayyul ke nuqūsh

aur ye chiin ke naġhmāt kā majmūa hai

mez ke goshe pe rakkhā huā gautam kā ye but

tum ko achchhā na lagegā shāyad

muddateñ guzrīñ usī kamre meñ jis meñ ham tum

guftugū karte the

is jañg par

is duniyā par

aur maujūda adab par ye ḳhayālāt kī rau

art aur jañg

january kī ye hasīñ raat aur is par ai dost

ye masahrī jo paḌī hai merī

jis ke baazū pe ye pītal ke hasīñ saañp kā aks

aaj kī raat bhī lahrātā hai

tum koī pariyoñ kā qissa to na samjhoge ise

maiñ agar tum se kahūñ

ye ki pītal ke usī saañp ne kaaTā hai use

ek ma.asūm sī doshīza ko

january kī ye hasīñ raat aur is par ai dast

mere ārāsta kamre kā nikhār

ek pukār

sard aur maut kī mānind añdherī ik raat

būñdeñ jaaḌe kī

ġharībī ke musalsal aañsū

ek aurat kī jabīñ par taare

sard tārīk sitāre ya.anī

ek doshīza ke ruḳhsār pe bosoñ ke nishāñ

nuqra.ī bose

tilā.ī bose

ab bhī har raat usī kamre meñ

usī shīshe kī masahrī pe kitābeñ le kar

''chīn kī nazmoñ kā majmūa

nuqūsh-e-tagore

aur kabhī saade se kāġhaz pe ḳhud apne hī ḳhayāloñ ke liye

ek sakūñ

ek gunāhoñ ke liye

ek qarār''

kuchh isī qism ke afkār meñ bas Duubā huā

so hī jaatā huuñ bahar-hāl ai dost

mez par rakkhe hue but ke hasīñ saa.e meñ

aur pītal kā ye zahrīlā saañp

sham.a ko Das ke savere hī se chalā jaatā hai

''jañg maut aur gunāh!!''

aur pital ka ye zahrila sanp

jis ki nazuk si zaban par ye KHunuk shama ki lau

lahr ki tarah andhere mein uTha karti hai

mere ek dost ne tohfe mein mujhe bheja hai

hain ye tagore ke be-rabt taKHayyul ke nuqush

aur ye chin ke naghmat ka majmua hai

mez ke goshe pe rakkha hua gautam ka ye but

tum ko achchha na lagega shayad

muddaten guzrin usi kamre mein jis mein hum tum

guftugu karte the

is jang par

is duniya par

aur maujuda adab par ye KHayalat ki rau

art aur jang

january ki ye hasin raat aur is par ai dost

ye masahri jo paDi hai meri

jis ke bazu pe ye pital ke hasin sanp ka aks

aaj ki raat bhi lahraata hai

tum koi pariyon ka qissa to na samjhoge ise

main agar tum se kahun

ye ki pital ke usi sanp ne kaTa hai use

ek masum si doshiza ko

january ki ye hasin raat aur is par ai dast

mere aarasta kamre ka nikhaar

ek pukar

sard aur maut ki manind andheri ek raat

bunden jaDe ki

gharibi ke musalsal aansu

ek aurat ki jabin par tare

sard tarik sitare yani

ek doshiza ke ruKHsar pe boson ke nishan

nuqrai bose

tilai bose

ab bhi har raat usi kamre mein

usi shishe ki masahri pe kitaben le kar

chin ki nazmon ka majmua

nuqush-e-tagore

aur kabhi sade se kaghaz pe KHud apne hi KHayalon ke liye

ek sakun

ek gunahon ke liye

ek qarar

kuchh isi qism ke afkar mein bas Duba hua

so hi jata hun bahar-haal ai dost

mez par rakkhe hue but ke hasin sae mein

aur pital ka ye zahrila sanp

shama ko Das ke sawere hi se chala jata hai

jang maut aur gunah!!