programme

ai shaḳhs agar 'josh' ko to DhūñDhnā chāhe

vo pichhle pahar halqa-e-irfāñ meñ milegā

aur sub.h ko vo nāzir-e-nazzāra-e-qudrat

taraf-e-chaman-o-sahn-e-bayābāñ meñ milegā

aur din ko vo sar-gashta-e-asrār-o-ma.ānī

shahr-e-hunar-o-kū-e-bayābāñ meñ milegā

aur shaam ko vo mard-e-ḳhudā rind-e-ḳharābāt

rahmat-kada-e-bāda-faroshāñ meñ milegā

aur raat ko vo ḳhalvatī-e-kākul-o-ruḳhsār

bazm-e-tarab-o-kūcha-e-ḳhūbāñ meñ milegā

aur hogā koī jabr to vo banda-e-majbūr

murde kī tarah kalba-e-ahzāñ meñ milegā

ai shaKHs agar 'josh' ko to DhunDhna chahe

wo pichhle pahar halqa-e-irfan mein milega

aur subh ko wo nazir-e-nazzara-e-qudrat

taraf-e-chaman-o-sahn-e-bayaban mein milega

aur din ko wo sar-gashta-e-asrar-o-maani

shahr-e-hunar-o-ku-e-bayaban mein milega

aur sham ko wo mard-e-KHuda rind-e-KHarabaat

rahmat-kada-e-baada-faroshan mein milega

aur raat ko wo KHalwati-e-kakul-o-ruKHsar

bazm-e-tarab-o-kucha-e-KHuban mein milega

aur hoga koi jabr to wo banda-e-majbur

murde ki tarah kalba-e-ahzan mein milega