punctuation

tumheñ bhejūñ kitāb-e-zindagī apnī

zarā tartīb de denā

jahāñ par baat mub.ham hai jise tafsīl lāzim hai

vahāñ par hāshiya denā

kahīñ gar do mukammal lafz ikaTThe ho ga.e hoñ to ye qurbat ġhair-fitrī hai

zarūrī hai munāsib fāsla denā

jahāñ par ḳhatm hotā ho koī dard-āshnā jumla

farāmoshī kā nuqta sabt kar denā

vahīñ par ḳhatm kar denā

na.e aurāq meñ le kar nahīñ chalnā

adaq sī istelāheñ haiñ ka.ī jin ko samajhne se

maiñ qāsir aaj tak huuñ

phir baḌe uljhāo haiñ jin kā sirā ab tak nahīñ miltā

tumheñ lāzim hai vahdānī ḳhatoñ meñ un kā matlab khol kar likhnā

maqām aise bhī haiñ jin par qadam yuuñ Dagmagā.e the

ki shānoñ par rakhī saarī imārat Dol jaatī thī

unheñ vāvīn de denā

ka.ī ḳhushiyoñ kī satreñ thiiñ

jo ġham-añgez pairoñ meñ kahīñ mil-jul ga.ī haiñ

chhāñT kar un ko alag karnā

nayā unvān de denā

zarā kuchh shakl ban jaa.e to yuuñ karnā

havā ke haath meñ dene se pahle

ik purānī naql apne paas rakhnā

ik mujhe irsāl kar denā

tumhein bhejun kitab-e-zindagi apni

zara tartib de dena

jahan par baat mubham hai jise tafsil lazim hai

wahan par hashiya dena

kahin gar do mukammal lafz ikaTThe ho gae hon to ye qurbat ghair-fitri hai

zaruri hai munasib fasla dena

jahan par KHatm hota ho koi dard-ashna jumla

faramoshi ka nuqta sabt kar dena

wahin par KHatm kar dena

nae auraq mein le kar nahin chalna

adaq si istelahen hain kai jin ko samajhne se

main qasir aaj tak hun

phir baDe uljhao hain jin ka sira ab tak nahin milta

tumhein lazim hai wahdani KHaton mein un ka matlab khol kar likhna

maqam aise bhi hain jin par qadam yun Dagmagae the

ki shanon par rakhi sari imarat Dol jati thi

unhen wawin de dena

kai KHushiyon ki satren thin

jo gham-angez pairon mein kahin mil-jul gai hain

chhanT kar un ko alag karna

naya unwan de dena

zara kuchh shakl ban jae to yun karna

hawa ke hath mein dene se pahle

ek purani naql apne pas rakhna

ek mujhe irsal kar dena