pukar

ye kachchī kaliyāñ gulāb jaisī

ye kis ne in ko masal diyā hai

ye kis ne in ko kuchal diyā hai

ki shāh-rāhoñ meñ haiñ fasurda

kahāñ haiñ maalī kahāñ haiñ ġhunche

kahāñ ga.e sab muhāfiz-e-gul

lahū kā kis ne ḳhirāj māñgā

ki sahn-e-gulshan lahū lahū hai

kabīda maalī fasurda ġhunche

hadoñ se apnī guzar ga.e haiñ

idhar udhar sab bikhar ga.e haiñ

hisār-e-zulmat meñ kho ga.e haiñ

hai kaun un ko azaan de kar

safoñ meñ lā kar khaḌā karegā

havas ke bandoñ ko dars degā

diyā jalā ke uḳhuvvatoñ kā

ye zulm ham sab saheñge kab tak

ye āshiyāne jaleñge kab tak

udaas gulshan rahegā kab tak

ye ḳhūn-e-nāhaq bahegā kab tak

udaas nasloñ ke vāriso tum

lahū kā kab tak ḳhirāj doge

anā kī mūrat ko toḌ Daalo

havas ke bando sitam-zarīfo

uḳhuvvatoñ kā salām le kar

mohabbatoñ kā payām le kar

baḌho ki manzil pukārtī hai

baḌho ki manzil pukārtī hai

ye kachchi kaliyan gulab jaisi

ye kis ne in ko masal diya hai

ye kis ne in ko kuchal diya hai

ki shah-rahon mein hain fasurda

kahan hain mali kahan hain ghunche

kahan gae sab muhafiz-e-gul

lahu ka kis ne KHiraj manga

ki sahn-e-gulshan lahu lahu hai

kabida mali fasurda ghunche

hadon se apni guzar gae hain

idhar udhar sab bikhar gae hain

hisar-e-zulmat mein kho gae hain

hai kaun un ko azan de kar

safon mein la kar khaDa karega

hawas ke bandon ko dars dega

diya jala ke uKHuwwaton ka

ye zulm hum sab sahenge kab tak

ye aashiyane jalenge kab tak

udas gulshan rahega kab tak

ye KHun-e-nahaq bahega kab tak

udas naslon ke wariso tum

lahu ka kab tak KHiraj doge

ana ki murat ko toD Dalo

hawas ke bando sitam-zarifo

uKHuwwaton ka salam le kar

mohabbaton ka payam le kar

baDho ki manzil pukarti hai

baDho ki manzil pukarti hai