purani filon mein gungunati sham

ab in bosīda kāġhaz ke pulandoñ kī

zarūrat kyā bachī hai

in lifāfoñ par pate saare

purāne ho chuke haiñ

in ko rakhnā kis liye

be-rañg tahrīroñ meñ Duube

in ḳhatoñ kī kyuuñ hifāzat chāhiye

ye purānī fileñ zaa.e agar ho jaa.eñ

to nuqsān kyā hai

haath kyuuñ rukte haiñ

in kāġhaz ke TukḌoñ ko jalāne meñ

ab in kī ma.anaviyat kyā bachī hai

itne maah o saal ke ba.ad

is zamāne meñ

mahak kaisī hai in meñ

yā jo ḳhushbū sī lapaktī hai

to kyā hai ye rutoñ kā ḳharḳhasha ab koī rut hogī ki jis ne

kāġhazoñ par chhoḌ rakkhā hai asar

barsoñ guzarte haiñ

nahīñ, kuchh bhī nahīñ yaad aatā hai

lekin ye mere haath in ko chhūte hī

kyuuñ kāñpne lagte haiñ

pahle bhī to bosīda bahut kāġhaz jalā.e haiñ

na jaane in purānī filoñ par

kaun se guzre hue

lamhoñ ke saa.e haiñ

ab in bosida kaghaz ke pulandon ki

zarurat kya bachi hai

in lifafon par pate sare

purane ho chuke hain

in ko rakhna kis liye

be-rang tahriron mein Dube

in KHaton ki kyun hifazat chahiye

ye purani filen zae agar ho jaen

to nuqsan kya hai

hath kyun rukte hain

in kaghaz ke TukDon ko jalane mein

ab in ki manawiyat kya bachi hai

itne mah o sal ke baad

is zamane mein

mahak kaisi hai in mein

ya jo KHushbu si lapakti hai

to kya hai ye ruton ka KHarKHasha ab koi rut hogi ki jis ne

kaghazon par chhoD rakkha hai asar

barson guzarte hain

nahin, kuchh bhi nahin yaad aata hai

lekin ye mere hath in ko chhute hi

kyun kanpne lagte hain

pahle bhi to bosida bahut kaghaz jalae hain

na jaane in purani filon par

kaun se guzre hue

lamhon ke sae hain