qanun-e-qudrat

galiyoñ kī sham'eñ bujh ga.iiñ aur shahr suunā ho gayā

bijlī kā khambā thaam kar bāñkā sipāhī so gayā

tārīkiyoñ kī deviyāñ karne lagīñ sargoshiyāñ

ik dhīmī dhīmī taan meñ gaane lagīñ ḳhāmoshiyāñ

mashriq ke parbat se vare ubhrīñ ghaTā.eñ yak-ba-yak

añgḌā.iyāñ lene lagīñ be-ḳhud havā.eñ yak-ba-yak

taare nikaltī badliyāñ chāroñ taraf chhāne lagīñ

chham-chham phuvāroñ kī jhaḌī dhartī pe barsāne lagīñ

maa.eñ lapaktī haiñ kahīñ bachche bilakte haiñ kahīñ

aur khaaT lene ke liye būḌhe uchakte haiñ kahīñ

ik sarsarāhaT sī uThī lahrā.ī tham kar rah ga.ī

har chiiz ne āñkheñ malīñ har chiiz jam kar rah ga.ī

phir gungunātī zulmatoñ kā sehr har sū chhā gayā

bādal kahīñ gum ho ga.e tāroñ pe joban aa gayā

qudrat ke sab chhoTe baḌe qānūn haiñ yaksāñ magar

parde paḌe haiñ jā-ba-jā chhantī nahīñ jin se nazar

insān kā mā'sūm dil tārīk suunā shahr hai

jis ke tale ehsās kī chingāriyoñ kī lahr hai

jab dekhtā hai vo kahīñ badmast panghaT vāliyāñ

gāloñ ko jin ke chūmtī haiñ patlī patlī bāliyāñ

zulfeñ ghaTāoñ kī tarah āñkheñ sitāroñ kī tarah

chalnā havāoñ kī tarah rangat sharāroñ kī tarah

lahñge kī lahroñ ke tale makkhan se paañv raqs meñ

pagDanDiyoñ ke us taraf gāgar kī chhāñv raqs meñ

siine chhalakte mai-kade aur hoñT paimānoñ ke lab

Taḳhnoñ pe sajtī jhāñjhareñ hañsnā hañsānā be-sabab

ye dekh kar añgḌā.iyāñ letā hai dil insān kā

aur is kī har dhaḌkan pe hotā hai gumāñ tūfān kā

galiyoñ meñ chhup jaatī haiñ jab ye chaltī phirtī bijliyāñ

hotā hai taarī ruuh par sunsān rātoñ kā samāñ

galiyon ki sham'en bujh gain aur shahr suna ho gaya

bijli ka khamba tham kar banka sipahi so gaya

tarikiyon ki dewiyan karne lagin sargoshiyan

ek dhimi dhimi tan mein gane lagin KHamoshiyan

mashriq ke parbat se ware ubhrin ghaTaen yak-ba-yak

angDaiyan lene lagin be-KHud hawaen yak-ba-yak

tare nikalti badliyan chaaron taraf chhane lagin

chham-chham phuwaron ki jhaDi dharti pe barsane lagin

maen lapakti hain kahin bachche bilakte hain kahin

aur khaT lene ke liye buDhe uchakte hain kahin

ek sarsarahaT si uThi lahrai tham kar rah gai

har chiz ne aankhen malin har chiz jam kar rah gai

phir gungunati zulmaton ka sehr har su chha gaya

baadal kahin gum ho gae taron pe joban aa gaya

qudrat ke sab chhoTe baDe qanun hain yaksan magar

parde paDe hain ja-ba-ja chhanti nahin jin se nazar

insan ka ma'sum dil tarik suna shahr hai

jis ke tale ehsas ki chingariyon ki lahr hai

jab dekhta hai wo kahin badmast panghaT waliyan

galon ko jin ke chumti hain patli patli baaliyan

zulfen ghaTaon ki tarah aankhen sitaron ki tarah

chalna hawaon ki tarah rangat shararon ki tarah

lahnge ki lahron ke tale makkhan se panw raqs mein

pagDanDiyon ke us taraf gagar ki chhanw raqs mein

sine chhalakte mai-kade aur honT paimanon ke lab

TaKHnon pe sajti jhanjharen hansna hansana be-sabab

ye dekh kar angDaiyan leta hai dil insan ka

aur is ki har dhaDkan pe hota hai guman tufan ka

galiyon mein chhup jati hain jab ye chalti phirti bijliyan

hota hai tari ruh par sunsan raaton ka saman