qabron par barish
bārish girtī hai
maTyālī qabroñ par bārish girtī hai
hadd-e-nazar tak jal-thal
siilā siilā ḳhvāb musalsal
yaad nahīñ maiñ ne bārish ko pahlī baar kahāñ dekhā thā
khiḌkī meñ yā ḳhvāb meñ
chhat par yā dariyā ke kināre
africa ke bachchoñ kī banjar āñkhoñ meñ
yā bangāl meñ nangī lāshoñ vaale sogī sāhiloñ par
kitnī bārisheñ dafn haiñ jaane is bārish ke nīche
ek galī ke ThanDe paanī meñ bhūlā bachpan chaltā thā
ek mahaktā āñchal koī giilā chehra poñchh rahā thā
jaane kahāñ maiñ pheñk aayā huuñ
vo dil aur vo juute
tairtī taḳhtiyāñ bhīge baste
pyāsī kuuk kisī koyal kī
duur harī tanhā.ī meñ
ik giit jo us ke lab ne mere lab se juḌ kar gaayā thā
ik jaltī bujhtī shaam judā.ī
sāvan kī pahlī būñdoñ meñ
jis ne itne rang bhare the
merī umr ke ḳhālī-pan meñ
aaj ḳhud us kā apnā koī rang nahīñ
maTyālī qabroñ par bārish girtī hai
be-maqsad hai jaise zindagī
be-ma.anī hai jaise maut
barish girti hai
maTyali qabron par barish girti hai
hadd-e-nazar tak jal-thal
sila sila KHwab musalsal
yaad nahin main ne barish ko pahli bar kahan dekha tha
khiDki mein ya KHwab mein
chhat par ya dariya ke kinare
africa ke bachchon ki banjar aankhon mein
ya bangal mein nangi lashon wale sogi sahilon par
kitni barishen dafn hain jaane is barish ke niche
ek gali ke ThanDe pani mein bhula bachpan chalta tha
ek mahakta aanchal koi gila chehra ponchh raha tha
jaane kahan main phenk aaya hun
wo dil aur wo jute
tairti taKHtiyan bhige baste
pyasi kuk kisi koyal ki
dur hari tanhai mein
ek git jo us ke lab ne mere lab se juD kar gaya tha
ek jalti bujhti sham judai
sawan ki pahli bundon mein
jis ne itne rang bhare the
meri umr ke KHali-pan mein
aaj KHud us ka apna koi rang nahin
maTyali qabron par barish girti hai
be-maqsad hai jaise zindagi
be-mani hai jaise maut
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.