qartaba ka muhasara

hāmila badliyoñ ne

apne kaTe-phaTe kināroñ meñ

chāñdī kī jhālareñ laTkā rakhī thiiñ

aur apnī dulā.iyoñ ke baḳhiyoñ meñ

rañgoñ kī bichkāriyāñ chhupā rakkhī thiiñ

ufuq surḳh thā

jaise shahr ke shohde

Darpok dukān-dāroñ par

apnī dhaak jamāne

na.ī kaTā.iyāñ kamāne par muqarrar huuñ

sode kī botaloñ se

ek dūsre par hamla-āvar huuñ

aur fuTpāthoñ par

shīshoñ ke TukḌoñ se

ajnabī rāhgīroñ ke

nañge pairoñ se

sirf unnāb dastiyāb ho

zamīn gulnār bane

bas isī tarah kā rañg āsmān meñ

khilā huā milā

raat kī fasīl ke qarīb

shaam kā muhāsara kiye

paḌā huā thā maiñ

*

ai allāma aaj

tere kisān kī kāfir beTī

apne giit utaar ke

merī samt se

apnā biddat phere

isī nīm-barahna ḳhūnīñ-manzar meñ

ugī huī thī

vaadī ke diye meñ

sho.ale kī tarah

laraz rahī thī

is kī nañgī piiTh par

tanī huī spaini riiḌh kī haDDī ke

aas paas

muztarib chuTkiyoñ bhare

rasīle kūlhoñ ke

jalālī tanāv ne

do nanhe nanhe qaus banā diye the

jin meñ jaate din kī raushnī

paare kī tarah

phisal phisal kar jam.a ho rahī thī

aur un gūñge halqoñ ke

tañg-dān meñ

jaan paḌ ga.ī thī

aaj unhī kosoñ meñ

apnī āñkheñ chhoḌ chalā

aur apne ġham bhuul gayā

mere log na.ī tahzīb

musaḳhḳhar karne aa.e the

vo tārīḳh hamesha yaad rahī

us kā sog abhī tak hai

hamila badliyon ne

apne kaTe-phaTe kinaron mein

chandi ki jhaalaren laTka rakhi thin

aur apni dulaiyon ke baKHiyon mein

rangon ki bichkariyan chhupa rakkhi thin

ufuq surKH tha

jaise shahr ke shohde

Darpok dukan-daron par

apni dhak jamane

nai kaTaiyan kamane par muqarrar hun

sode ki botalon se

ek dusre par hamla-awar hun

aur fuTpathon par

shishon ke TukDon se

ajnabi rahgiron ke

nange pairon se

sirf unnab dastiyab ho

zamin gulnar bane

bas isi tarah ka rang aasman mein

khila hua mila

raat ki fasil ke qarib

sham ka muhasara kiye

paDa hua tha main

*

ai allama aaj

tere kisan ki kafir beTi

apne git utar ke

meri samt se

apna biddat phere

isi nim-barahna KHunin-manzar mein

ugi hui thi

wadi ke diye mein

shoale ki tarah

laraz rahi thi

is ki nangi piTh par

tani hui spaini riDh ki haDDi ke

aas pas

muztarib chuTkiyon bhare

rasile kulhon ke

jalali tanaw ne

do nanhe nanhe qaus bana diye the

jin mein jate din ki raushni

pare ki tarah

phisal phisal kar jama ho rahi thi

aur un gunge halqon ke

tang-dan mein

jaan paD gai thi

aaj unhi koson mein

apni aankhen chhoD chala

aur apne gham bhul gaya

mere log nai tahzib

musaKHKHar karne aae the

wo tariKH hamesha yaad rahi

us ka sog abhi tak hai