raegani ki bashaarat

havā ne kunj-e-gum-gashta meñ aa ke

merī palkoñ par jamī vīrāniyoñ kī ḳhaak ko jhāḌā

aur apnī shabnam afshānī se merī bāñjh palkoñ ko

guhar-bārī meñ badlā

ye samajhtī hai

maiñ us ke haath meñ uñglī thamā kar

phir kisī nā-dīda parbat ke safar kī zid karūñgā

tā-abad ham-rāh phiruñgā

vaqt ik disposable rishte kī sūrat hai

jo istimāl hotā hai

basar hotā nahīñ...

mujhe takmīl kī sarhad pe lā ke rā.egānī kī bashārat dī ga.ī hai

maiñ jo reza reza malba bantī ābādī kā nauha-ḳhvāñ huuñ

mere haath kī ḳhvāhish

qalam se, phuul kī pattī banānā chāhtī hai...

magar maiñ malbe kī īñToñ kī gintī kar rahā huuñ

ghar ke vīrāne meñ baiThā

yaad aane vaale lamhoñ ko

bhulāne ke liye dohrā rahā huuñ

hawa ne kunj-e-gum-gashta mein aa ke

meri palkon par jami viraniyon ki KHak ko jhaDa

aur apni shabnam afshani se meri banjh palkon ko

guhar-bari mein badla

ye samajhti hai

main us ke hath mein ungli thama kar

phir kisi na-dida parbat ke safar ki zid karunga

ta-abad ham-rah phirunga

waqt ek disposable rishte ki surat hai

jo istimal hota hai

basar hota nahin

mujhe takmil ki sarhad pe la ke raegani ki bashaarat di gai hai

main jo reza reza malba banti aabaadi ka nauha-KHwan hun

mere hath ki KHwahish

qalam se, phul ki patti banana chahti hai

magar main malbe ki inTon ki ginti kar raha hun

ghar ke virane mein baiTha

yaad aane wale lamhon ko

bhulane ke liye dohra raha hun