rah-e-rast

jo haq par hai īmān-e-kāmil hamārā

banā legā kyā zor-e-bātil hamārā

jo ham muttahid ho ke rahte vatan meñ

na thā koī madd-e-muqābil hamārā

ġhulāmī kī ḳhū bū musallat hai ham par

dimāġh ab hamārā na ab dil hamārā

rah-e-rāst se gar qadam Dagmagāyā

na hogā guzar tā-ba-manzil hamārā

jahāñ scent par scent haiñ ahl-e-ālam

vahāñ darja-e-fasl hai nil hamārā

haiñ āvāra-e-dasht majnūñ kī sūrat

na lailā hamārī na mahmil hamārā

na kashtī na kashtī ke mallāh apne

na dariyā na dariyā kā sāhil hamārā

ta.assub ne barbād ham ko kiyā hai

yahī hai yahī sirf qātil hamārā

vatan par musallat haiñ añgrez jab tak

panapnā yaqīnan hai mushkil hamārā

jo haq par hai iman-e-kaamil hamara

bana lega kya zor-e-baatil hamara

jo hum muttahid ho ke rahte watan mein

na tha koi madd-e-muqabil hamara

ghulami ki KHu bu musallat hai hum par

dimagh ab hamara na ab dil hamara

rah-e-rast se gar qadam Dagmagaya

na hoga guzar ta-ba-manzil hamara

jahan scent par scent hain ahl-e-alam

wahan darja-e-fasl hai nil hamara

hain aawara-e-dasht majnun ki surat

na laila hamari na mahmil hamara

na kashti na kashti ke mallah apne

na dariya na dariya ka sahil hamara

tassub ne barbaad hum ko kiya hai

yahi hai yahi sirf qatil hamara

watan par musallat hain angrez jab tak

panapna yaqinan hai mushkil hamara