raqim ki maut

chand safed bāloñ vaale naujavān

ḳhālī jeboñ kā bojh liye

añdhere kamroñ meñ band haiñ

vo jaan chuke haiñ ki lafzoñ kī bārish

bhūke peT kī pyaas bujhāne ke liye kaafī nahīñ

saarī raat taḳhayyul kī kokh se alfāz janñe ke baa'd

din bhar vo ḳhudā ke aage ehtijāj karte haiñ

vo jaan chuke haiñ

adab sirf hasīnoñ ko mash.hūr kar saktā hai

vo raat bhar apnī nazmoñ ko

bebasī ke giit sunā sunā kar thak jaate haiñ

āḳhir vo apnī tamām nazmoñ ko phāñsī kī sazā sunā kar qalam kī

nib toḌ dete haiñ

aur pankhe se laTak jaate haiñ

chand safed baalon wale naujawan

KHali jebon ka bojh liye

andhere kamron mein band hain

wo jaan chuke hain ki lafzon ki barish

bhuke peT ki pyas bujhane ke liye kafi nahin

sari raat taKHayyul ki kokh se alfaz janne ke ba'd

din bhar wo KHuda ke aage ehtijaj karte hain

wo jaan chuke hain

adab sirf hasinon ko mashhur kar sakta hai

wo raat bhar apni nazmon ko

bebasi ke git suna suna kar thak jate hain

aaKHir wo apni tamam nazmon ko phansi ki saza suna kar qalam ki

nib toD dete hain

aur pankhe se laTak jate hain