raste mein sham ka muqaddar hona

us ke lahje meñ shaam ho rahī thī

aur rāste rāstoñ ko chhoḌte hue

kisī aur rāste par jā rahe the

us kā badan ḳhud se alag hone ke liye

apne hī badan se pūchh rahā thā

kuñvāre rahne kī tapasyā akārat ga.ī

kisī chāhne vaale ko

us ne ek bosa bhī nahīñ diyā

us kī miTTī ne kisī aur miTTī ko chhuā hī nahīñ

sharī.at kī āmariyyat ko

ḳhud us ne hī dāvat dī thī

varna ḳhudā se kisī ġhalat ko

ġhalat chhūne kī baat to kabhī huī hī nahīñ thī

aur koī ham se bhuul ke

hamārī āḳhirī ḳhvāhish bhī na pūchhe

aisā to kabhī huā hī nahīñ

Dūbte hue jahāz meñ bhāgne vaale

āḳhirī chūhe ko bhī to

kisī ne bhī nahīñ dekhā

sivā.e us ke ki

Dubone vaale paanī ne

ḳhud ko dekhā

yā Dūbne vaale ko dekhā

mohabbat jin rañgoñ se

banī huī kahānī thī

us ke kisī bhī kirdār ko

is ne kabhī bhūle se bhī paas na aane diyā

ek ThanDī jāmid bisāt par dauḌtī huī

māyūsī ko

parinda banñe kī ḳhvāhish to zarūr rahī hogī

magar kyā koī ye dekh saktā hai ki

kisī botal se kaag arne ke manzar meñ

botal ke bātin par kyā guzartī hai

kisī ġhalat muñh se nikle hue lafz se

zindagī kī āb-o-havā par kyā guzartī hai

duniyā meñ hone vaale kisī bhī zulm ne

bas misāl hī to qaa.em kī

ek tārīḳh hī to banā.ī

haath meñ uThā.e hue ek patthar se

an-ginat hathiyāroñ tak

darmiyān meñ

zamāne to an-ginat rahe hoñge

yā tārīḳh to ek hī thī

kisī ġhalat ko sahī meñ badalne kī ḳhvāhish

duniyā kā nizām badal saktī to

aaj tak ham ġhalat ḳhvāb

na dekh rahe hote

phir ye azaab kyā hai ki

ham ek puurī zindagī

ġhalat ḳhvāboñ ke havāle karte hue

ḳhud ḳhvāb ho jaa.eñ

ye aur baat ki

pur-asrār ġhaib meñ

yaqīn na rakhne vaale ko bhī

kisī bhī ġhaib se

kuchh paane yā madad lene kī

ḳhvāhish to hotī hai

aur ḳhvāhish kā kyā hai

ḳhvāhish agar zamīn par reñgne vaalī

chyūñTī bhī ho to

vo hāthī ko halāk kar saktī hai

ek chyūñTī hāthī ko

is liye halāk kar detī hai ki

use is ke sar tak

pahanñe kī raah kā gyaan

aadmī se kahīñ zyāda hotā hai

afsos ki chyūñTī se zyāda

gyaan vaalā aadmī to

zamīn par paidā hī nahīñ huā

afsos pahāḌ kī chaḌhā.ī chaḌhne

aur ūñchī choTiyoñ ko

sar karne vāloñ meñ se

koī ek bhī aisā nahīñ huā

jo pahle zindagī naam ke hāthī ke sarkī

chaḌhā.ī chaḌhtā yā is ke sar ko

sar kar chukā hotā

aadmī ne ghar banāyā

is meñ rahne ke liye

magar vo us meñ kabhī rahā is liye nahīñ ki

rū-e-zamīn par

kisī bhī ghar kā bātin nahīñ ban sakā

ek puurī duniyā kā zāhir to

hamārī nazar meñ rakh diyā gayā

magar bātin se banī huī

koī duniyā to banī hī nahīñ

to ham kyā dekhte

yā dikhāne vāloñ se ham kyā kahte

yā is se kyā kahte

jis ke lahje meñ shaam hone se pahle

din kī raushnī kī

koī bisāt to rahī hogī

palaT ke kuchh dekhne kī adā bhī

nahīñ ma.alūm thī

varna koī kah saktā hai ki

use asbāb se bharī huī duniyā se

kuchh mayassar aayā

nahīñ kuchh bhī to nahīñ

yā jo duniyā

asbāb se bharī huī dikhā.ī ga.ī

vo ḳhud apnī jagah thī bhī yā nahīñ

aur is kī koī bhī shai

apnī jagah thī bhī yā nahīñ

us ke lahje mein sham ho rahi thi

aur raste raston ko chhoDte hue

kisi aur raste par ja rahe the

us ka badan KHud se alag hone ke liye

apne hi badan se puchh raha tha

kunware rahne ki tapasya akarat gai

kisi chahne wale ko

us ne ek bosa bhi nahin diya

us ki miTTi ne kisi aur miTTi ko chhua hi nahin

shariat ki aamariyyat ko

KHud us ne hi dawat di thi

warna KHuda se kisi ghalat ko

ghalat chhune ki baat to kabhi hui hi nahin thi

aur koi hum se bhul ke

hamari aaKHiri KHwahish bhi na puchhe

aisa to kabhi hua hi nahin

Dubte hue jahaz mein bhagne wale

aaKHiri chuhe ko bhi to

kisi ne bhi nahin dekha

siwae us ke ki

Dubone wale pani ne

KHud ko dekha

ya Dubne wale ko dekha

mohabbat jin rangon se

bani hui kahani thi

us ke kisi bhi kirdar ko

is ne kabhi bhule se bhi pas na aane diya

ek ThanDi jamid bisat par dauDti hui

mayusi ko

parinda banne ki KHwahish to zarur rahi hogi

magar kya koi ye dekh sakta hai ki

kisi botal se kag arne ke manzar mein

botal ke baatin par kya guzarti hai

kisi ghalat munh se nikle hue lafz se

zindagi ki aab-o-hawa par kya guzarti hai

duniya mein hone wale kisi bhi zulm ne

bas misal hi to qaem ki

ek tariKH hi to banai

hath mein uThae hue ek patthar se

an-ginat hathiyaron tak

darmiyan mein

zamane to an-ginat rahe honge

ya tariKH to ek hi thi

kisi ghalat ko sahi mein badalne ki KHwahish

duniya ka nizam badal sakti to

aaj tak hum ghalat KHwab

na dekh rahe hote

phir ye azab kya hai ki

hum ek puri zindagi

ghalat KHwabon ke hawale karte hue

KHud KHwab ho jaen

ye aur baat ki

pur-asrar ghaib mein

yaqin na rakhne wale ko bhi

kisi bhi ghaib se

kuchh pane ya madad lene ki

KHwahish to hoti hai

aur KHwahish ka kya hai

KHwahish agar zamin par rengne wali

chyunTi bhi ho to

wo hathi ko halak kar sakti hai

ek chyunTi hathi ko

is liye halak kar deti hai ki

use is ke sar tak

pahanne ki rah ka gyan

aadmi se kahin zyaada hota hai

afsos ki chyunTi se zyaada

gyan wala aadmi to

zamin par paida hi nahin hua

afsos pahaD ki chaDhai chaDhne

aur unchi choTiyon ko

sar karne walon mein se

koi ek bhi aisa nahin hua

jo pahle zindagi nam ke hathi ke sarki

chaDhai chaDhta ya is ke sar ko

sar kar chuka hota

aadmi ne ghar banaya

is mein rahne ke liye

magar wo us mein kabhi raha is liye nahin ki

ru-e-zamin par

kisi bhi ghar ka baatin nahin ban saka

ek puri duniya ka zahir to

hamari nazar mein rakh diya gaya

magar baatin se bani hui

koi duniya to bani hi nahin

to hum kya dekhte

ya dikhane walon se hum kya kahte

ya is se kya kahte

jis ke lahje mein sham hone se pahle

din ki raushni ki

koi bisat to rahi hogi

palaT ke kuchh dekhne ki ada bhi

nahin malum thi

warna koi kah sakta hai ki

use asbab se bhari hui duniya se

kuchh mayassar aaya

nahin kuchh bhi to nahin

ya jo duniya

asbab se bhari hui dikhai gai

wo KHud apni jagah thi bhi ya nahin

aur is ki koi bhi shai

apni jagah thi bhi ya nahin