raat ke jadu sahar ke aaine se

al-hazar

raat ke jaadū

sahar ke aa.ine se

naḳhl-e-hairat par chahaktī bulbuloñ se

ūñghtī galiyoñ meñ bahtī tīrgī se

sabz saa.e ke jilau meñ

narm qadmoñ se zamīñ ko gudgudātī naddiyoñ se al-hazar

said kab se hai ye duniyā ālam-e-ījād kī

shakl pahchānī nahīñ jaatī kisī bhī yaad kī

ḳhalq hotī haiñ anokhī sūrateñ uftād kī

sab vahī kuchh hai magar lagtā hai jaise vo nahīñ

kuchh anokhā aur kuchh kuchh sāniya hai kuchh kahīñ

aur agar sab kuchh vahī hai to savād-e-shahr meñ

dhuup kī mīThī chubhan kyoñ phuul muskātī nahīñ

sāñvle saa.e se kyoñ din kī mahak jaatī nahīñ

raat aatī hai to kyoñ tārīk ho paatī nahīñ

yuuñ gumāñ hotā hai

jaise kho chuke haiñ ham vo ḳhvāb

jis ke hone se shu.ūr-e-dosh-o-fardā thā hameñ

jis ke hone se yaqīñ thā apne hone kā hameñ

kho chuke haiñ ham vo ḳhvāb-e-dil-nashīñ

aur koī sūrat palaT jaane kī ab mumkin nahīñ

so hameñ zanjīr honā hī hai is tanhā.ī kā

jis ne andhā kar diyā hai fasl-e-gul kā aa.ina

jis ne paidā kar diyā hai ḳhuuñ meñ ik be-nām Dar

al-hazar

al-hazar raat ke jaadū sahar ke aa.ine se al-hazar

al-hazar

raat ke jadu

sahar ke aaine se

naKHl-e-hairat par chahakti bulbulon se

unghti galiyon mein bahti tirgi se

sabz sae ke jilau mein

narm qadmon se zamin ko gudgudati naddiyon se al-hazar

said kab se hai ye duniya aalam-e-ijad ki

shakl pahchani nahin jati kisi bhi yaad ki

KHalq hoti hain anokhi suraten uftad ki

sab wahi kuchh hai magar lagta hai jaise wo nahin

kuchh anokha aur kuchh kuchh saniya hai kuchh kahin

aur agar sab kuchh wahi hai to sawad-e-shahr mein

dhup ki miThi chubhan kyon phul muskati nahin

sanwle sae se kyon din ki mahak jati nahin

raat aati hai to kyon tarik ho pati nahin

yun guman hota hai

jaise kho chuke hain hum wo KHwab

jis ke hone se shuur-e-dosh-o-farda tha hamein

jis ke hone se yaqin tha apne hone ka hamein

kho chuke hain hum wo KHwab-e-dil-nashin

aur koi surat palaT jaane ki ab mumkin nahin

so hamein zanjir hona hi hai is tanhai ka

jis ne andha kar diya hai fasl-e-gul ka aaina

jis ne paida kar diya hai KHun mein ek be-nam Dar

al-hazar

al-hazar raat ke jadu sahar ke aaine se al-hazar