raat ke pichhle pahar

shaam hī se thī fazā meñ kisī jalte hue kapḌe kī bisāñd

aur havā chaltī thī jaise

us ke zaḳhmī hoñ qadam

dīda-e-mahr ne anjāne ḳhatar se muḌ kar

jaate jaate baḌī hasrat se ka.ī baar zamīñ ko dekhā

lekin is sabz lakīr

is daraḳhtoñ kī harī baaḌ ke paar

kuchh na paayā koī sho.ala na sharār

aur phir raat ke tannūr se ublā paanī

tīrgiyyoñ kā siyah favvārā

dekhte dekhte tasvīr har ek chiiz kī dhundlāne lagī

duur tak kaale samundar kī humaktī lahreñ

hāñpte sīnoñ kī mānind karāñ-tā-karāñ phail ga.iiñ

aur jab raat paḌī

siskiyāñ ban ga.iiñ jhoñkoñ kī sadā

dam-ba-ḳhud ho ga.e us vaqt dar-o-bām

jaise aahaT kisī tūfāñ kī sunā chāhte hoñ

āñhkeñ mal mal ke charāġhoñ kī lavoñ ne dekhā

lekin is sabz lakīr

is daraḳhtoñ kī harī baaḌ ke paar

kuchh na paayā koī sho.ala na sharār

raat ke pichhle pahar

nā-gahāñ niiñd se chauñkī jo zamīn

is ke hoñToñ pe thī ġhamnāk karāh

karb-añgez karāh

us ke siine pe ravāñ

boot lohe ke gumakte hue boot

jis tarah kāñch kī chādar pe luḌhaktī huī patthar kī sileñ

har qadam ek na.ī chīḳh janam letī thī

ḳhaak se dād-e-sitam letī thī

sham hi se thi faza mein kisi jalte hue kapDe ki bisand

aur hawa chalti thi jaise

us ke zaKHmi hon qadam

dida-e-mahr ne anjaane KHatar se muD kar

jate jate baDi hasrat se kai bar zamin ko dekha

lekin is sabz lakir

is daraKHton ki hari baD ke par

kuchh na paya koi shoala na sharar

aur phir raat ke tannur se ubla pani

tirgiyyon ka siyah fawwara

dekhte dekhte taswir har ek chiz ki dhundlane lagi

dur tak kale samundar ki humakti lahren

hanpte sinon ki manind karan-ta-karan phail gain

aur jab raat paDi

siskiyan ban gain jhonkon ki sada

dam-ba-KHud ho gae us waqt dar-o-baam

jaise aahaT kisi tufan ki suna chahte hon

aanhken mal mal ke charaghon ki lawon ne dekha

lekin is sabz lakir

is daraKHton ki hari baD ke par

kuchh na paya koi shoala na sharar

raat ke pichhle pahar

na-gahan nind se chaunki jo zamin

is ke honTon pe thi ghamnak karah

karb-angez karah

us ke sine pe rawan

boot lohe ke gumakte hue boot

jis tarah kanch ki chadar pe luDhakti hui patthar ki silen

har qadam ek nai chiKH janam leti thi

KHak se dad-e-sitam leti thi