ramzan aaya

phir aagyā jahāñ meñ ramzān kā mahīna

allāh ke karam aur ehsān kā mahīna

allāh kī ināyat aur us kī ḳhaas rahmat

ham ko atā kiyā hai qur.ān kā mahīna

dī hai hameñ ḳhudā ne roze kī aisī ne.amat

ahl-e-ḳhirad samajhte haiñ is kī qadr-o-qīmat

shaitānī harkatoñ se rakkhe hai duur roza

baḳhshe hai aadmī ko dil kā surūr roza

ahkām par ḳhudā ke ham ko chalā.e roza

ham ko farishtoñ se bhī afzal banā.e roza

hukm-e-ḳhudā kī jis ne ta.amīl kar lī bachcho

us kī ināyatoñ se jholī bhī bhar lī bachcho

ye zabt-e-nafs kā hai aur sabr kā mahīna

ham ko sikhā rahā hai jiine kā ik qarīna

haiñ kis qadar munavvar rāteñ ibādatoñ se

aur itr-bār se haiñ din bhī riyāzatoñ se

rab ne atā kī ham ko iftār kī fazīlat

aa.ī samajh meñ khāne piine kī qadr-o-qīmat

ai rab qubūl kar le momin kī ye riyāzat

apne nabī ke sadqe meñ de de sab ko jannat

phir aagya jahan mein ramzan ka mahina

allah ke karam aur ehsan ka mahina

allah ki inayat aur us ki KHas rahmat

hum ko ata kiya hai quran ka mahina

di hai hamein KHuda ne roze ki aisi neamat

ahl-e-KHirad samajhte hain is ki qadr-o-qimat

shaitani harkaton se rakkhe hai dur roza

baKHshe hai aadmi ko dil ka surur roza

ahkaam par KHuda ke hum ko chalae roza

hum ko farishton se bhi afzal banae roza

hukm-e-KHuda ki jis ne tamil kar li bachcho

us ki inayaton se jholi bhi bhar li bachcho

ye zabt-e-nafs ka hai aur sabr ka mahina

hum ko sikha raha hai jine ka ek qarina

hain kis qadar munawwar raaten ibaadaton se

aur itr-bar se hain din bhi riyazaton se

rab ne ata ki hum ko iftar ki fazilat

aai samajh mein khane pine ki qadr-o-qimat

ai rab qubul kar le momin ki ye riyazat

apne nabi ke sadqe mein de de sab ko jannat