rangoon ka mushaera

mujhe rangōn se jab dāvat-e-sher-o-suḳhan aa.ī

tabī.at fāsle aur vaqt ke chakkar se ghabrā.ī

dil-e-bargashta ko lekin ye maiñ ne baat samjhā.ī

''nahīñ kuchh sub.ha-o-zunnār ke phande maiñ gīrā.ī''

''vafādārī meñ shaiḳh o barhaman kī āzmā.ish hai''

vahāñ rañgīni-e-sher-o-suḳhan kī āzmā.ish hai

karachi se piyā kī god meñ hindostāñ aayā

na.ī dehlī se kahne ko purānī dāstāñ aayā

javānī ke liye yādeñ maiñ sū-e-gulistāñ aayā

barā.e ahl-e-mahfil aur ba-yād-e-raftagāñ aayā

vo maskan thā vo madfan hai bahut se ahl-e-īmāñ kā

''vo ik gul-dasta hai ham be-ḳhudoñ ke tāq-e-nisyāñ kaa''

vo aisī sarzamīñ hai jis meñ ahl-e-dil abhī tak haiñ

jo shaiḳh o barhaman urdu ke haiñ qābil abhī tak haiñ

nishān-e-'mīr'-o-'ġhālib', 'dāġh' aur 'sā.il' abhī tak haiñ

jo sham.eñ bach ga.ī haiñ raunaq-e-mahfil abhī tak haiñ

''namī goyam darīñ gulshan gul-o-bāġh-o-bahār az man

''bahār az yaar o baaġh az yaar o gul az yaar o yaar az man''

uḌā dehlī se aur uḌ kar maiñ kalkatta meñ aa pahuñchā

thakā-hārā huā sāhil pe jaise nāḳhudā pahuñchā

maiñ apne sunñe vāloñ ke liye ban kar sadā pahuñchā

chalā urdu kī ḳhātir az-kujā aur tā-kujā pahuñchā

mirī urdu tirī ulfat meñ ab rangōn aayā huuñ

tire ushshāq kī mahfil meñ kuchh mazmūn laayā huuñ

mujhe rangoon se jab dawat-e-sher-o-suKHan aai

tabiat fasle aur waqt ke chakkar se ghabrai

dil-e-bargashta ko lekin ye main ne baat samjhai

nahin kuchh subha-o-zunnar ke phande main girai

wafadari mein shaiKH o barhaman ki aazmaish hai

wahan rangini-e-sher-o-suKHan ki aazmaish hai

karachi se piya ki god mein hindostan aaya

nai dehli se kahne ko purani dastan aaya

jawani ke liye yaaden main su-e-gulistan aaya

barae ahl-e-mahfil aur ba-yaad-e-raftagan aaya

wo maskan tha wo madfan hai bahut se ahl-e-iman ka

wo ek gul-dasta hai hum be-KHudon ke taq-e-nisyan ka

wo aisi sarzamin hai jis mein ahl-e-dil abhi tak hain

jo shaiKH o barhaman urdu ke hain qabil abhi tak hain

nishan-e-'mir'-o-'ghaalib', 'dagh' aur 'sail' abhi tak hain

jo shamen bach gai hain raunaq-e-mahfil abhi tak hain

nami goyam darin gulshan gul-o-bagh-o-bahaar az man

bahaar az yar o bagh az yar o gul az yar o yar az man

uDa dehli se aur uD kar main kalkatta mein aa pahuncha

thaka-haara hua sahil pe jaise naKHuda pahuncha

main apne sunne walon ke liye ban kar sada pahuncha

chala urdu ki KHatir az-kuja aur ta-kuja pahuncha

meri urdu teri ulfat mein ab rangoon aaya hun

tere ushshaq ki mahfil mein kuchh mazmun laya hun